Un adolescente ferido nun accidente de ciclomotor en Ribeira
Outra muller ferida tras dar varias voltas de campá en Boiro.
Por Europa Press / Redacción | A CORUÑA | 31/03/2025 | Actualizada ás 11:26
Dúas persoas resultaron feridas nas últimas horas en senllos accidentes en Ribeira e Boiro, un deles un adolescente condutor dun ciclomotor, segundo informa o Consorcio Provincial Contraincendios e Salvamento.
Ao redor das 21.45 horas, o parque provincial de Ribeira recibiu o aviso dun sinistro, na avenida da Coruña, cun coche e un ciclomotor implicados, sen persoas atrapadas pero si feridas. Ao chegar ao lugar, a Policía Local xa se atopaba alí dirixindo o tráfico. Os integrantes do vehículo non sufriron danos de relevancia mentres que o condutor do ciclomotor, un adolescente, atopábase tendido no chan, dolorido pero consciente. Estaba a ser atendido pola súa nai e unha muller que se identificou como médica.
En canto chegou a ambulancia, os bombeiros axudaron ao persoal de emerxencias a retirar o casco do ferido, colocarlle un collarín para logo trasladalo en ambulancia ao Hospital de Barbanza.
Por outra banda, o parque provincial de Boiro recibiu o aviso, sobre as 21.55 horas, dun vehículo accidentado cunha persoa ferida na AG-11 sentido Ribeira. O mesmo ocorreu nunha curva pechada con baixa visibilidade e con restos do vehículo en máis de 300 metros. Tras sinalizarse a zona, atoparon á condutora fora do vehículo.
A mesma indicoulles que deue moitas voltas de campá, chocando contra dúas medianas da estrada. A muller foi atendida polo 061 por dores no peito. Posteriormente, procedeuse á limpeza da zona.
