O teletraballo veu para quedar despois da pandemia da Covid
Máis do 12,4% dos galegos teletraballa de forma habitual, segundo un estudo de Randstad.
Por Europa Press / Redacción | Santiago de Compostela | 19/03/2025 | Actualizada ás 12:45
Máis do 12,4% dos galegos teletraballa de forma habitual, sendo Galicia a quinta comunidade autónoma en termos de implantación desta modalidade de emprego, segundo reflicte un estudo publicado este mércores por Randstad a partir de datos do Instituto Nacional de Estatística (INE) a peche de 2024.
A nivel estatal, preto do 15% dos empregados españois utiliza o teletraballo de forma regular, a cifra máis alta do últimos tres anos, só superada durante o confinamento pola pandemia do Covid, cando acudir a unha oficina ou posto de traballo físico requiría unha autorización especial.
"Os novos modelos de traballo híbridos están a se consolidar en España e no resto dos países desenvolvidos como consecuencia dunha demanda por parte dos empregados de implementar medidas que faciliten a conciliación entre a vida laboral e a persoal", destacou Oriol Mais, director xeral de Randstad Enterprise.
Antes da pandemia, o teletrabajo tiña unha presenza marxinal entre os empregados. Así, en 2019, menos do 5% dos ocupados traballaban desde casa máis da metade dos días. Coa irrupción da pandemia e a obrigación de confinarse, a porcentaxe de empregados que pasaron a teletraballar disparouse e, aínda que descendeu desde aquelas cifras máximas, "a tendencia non só se mantén, senón que vai avanzando ano tras ano", apunta Randstad.
O 14,6% de traballadores que teletraballa divídese practicamente a partes iguais entre aqueles que o fan de forma habitual e aqueles que só o utilizan de maneira ocasional. Así, o 7,5% do total de empregados teletraballa máis da metade dos días da semana; mentres que o 7,1% restante faino ocasionalmente ou menos da metade dos días da semana.
AUTONOMÍAS
Por comunidades autónomas, Madrid lidera o teletraballo, co 25,9% do total de traballadores que utilizan esta modalidade. O 13,5% faino de forma habitual, é dicir, máis da metade dos días da semana, mentres que o 12,4% faino ocasionalmente.
Tras Madrid sitúase Cataluña, co 16,2% de persoas teletraballando de forma regular ou ocasionalmente, seguidas de Comunidade Valenciana (14,4%), País Vasco (13,1%) e Galicia (12,4%). Pola contra, as comunidades que contan con menos empregados que utilizan o modelo híbrido de traballo son A Rioxa (6,3%), Canarias (8,2%), Navarra (9%), Castela e León (9,3%) e Murcia (9,4%).
