A Xunta explora novas vías de colaboración con Mañón para mellorar a atención a maiores

A conselleira de Política Social e Igualdade, Fabiola García, mantivo este sábado un encontro co alcalde de Mañón, Alfredo Dovale, co obxectivo de avaliar os recursos dispoñibles para a atención a persoas maiores neste concello da provincia da Coruña e abrir novas liñas de cooperación institucional.

Durante a reunión, García subliñou a relevancia de reforzar programas de envellecemento activo e saudable, especialmente en zonas rurais, onde a dispersión poboacional e o avellentamento da veciñanza esixen medidas adaptadas á realidade local.

A conselleira incidiu na necesidade de "manter e mellorar a atención no propio fogar como opción preferida polas persoas maiores", destacando neste sentido o programa Bono Coidado no Fogar, que ofrece axudas directas de ata 5.000 euros para facilitar os coidados no domicilio.

Segundo informou a Xunta, en 2023 destináronse 25.000 euros a este servizo no concello de Mañón, contribuíndo a que varias persoas dependentes puidesen permanecer nas súas casas con atención axeitada.

A conselleira comprometeuse a seguir apoiando ás entidades locais na prestación de servizos sociais, promovendo solucións "proximas e personalizadas" que contribúan a facer posible unha vida digna e autónoma no rural galego.

Esta reunión enmárcase na rolda de contactos que a Consellería está a manter cos concellos para avaliar as necesidades específicas de cada territorio e impulsar unha rede de coidados eficaz, accesible e sustentable.