Máis dunha trintena de vilas e cidades galegas mobilizaranse o 31 de marzo en solidariedade con Palestina

O vindeiro luns 31 de marzo, 34 localidades galegas, incluídas as sete grandes cidades, sumaranse á convocatoria de mobilizacións realizada pola Coordinadora Galega con Palestina para denunciar a ofensiva do Exército israelí na Franxa de Gaza, xa que, en palabras dos seus convocantes, "a ocupación, o bloqueo e o xenocidio continúan". As protestas, que xa estaban previstas e que se desenvolverán a partir das 19.30 horas, suceden nun contexto de violencia ascendente. Pese ao alto ao lume declarado en xaneiro, "a pasada semana rompeu unilateralmente a tregua asasinando a máis de 500 persoas nunha noite", denunciou Ánxela Gipinni, representante de Galiza con Palestina.

Por outra banda, Sami Ashour, presidente da Asociación Galaico Árabe, chamou a manifestarse polo "horror" que están a vivir as familias en Gaza e, desta forma, gritar: "Xa abonda de matar". Así mesmo, subliñou que Galicia lles adoitou a que haxa unha resposta de solidariedade "cando un pobo esta condenado á morte, á aniquilación total". "Aos que non matan en bombardeos, mátanos de fame ou de sede. Non hai auga potable, non hai hospitais nin atención médica. Hoxe mesmo atacaron aos talleres de reparación das ambulancias e servizo civil en Gaza", recolleu Ashour.

A data escollida para as concentracións ten unha "cuestión simbólica". A convocatoria está programada para o día posterior ao Día da Terra de Palestina, que conmemora a folga xeral de 1976 en resposta a un plan do Goberno israelí para a expropiación de terras palestinas. Gipinni apuntou que, con case xa 50 anos de distancia, "é unha data recoñecida internacionalmente, pero non ten consecuencias legais para Israel".

A listaxe de localidades que se suman a esta xornada é o seguinte, en orde alfabética: A Coruña, A Guarda, Allariz, Betanzos, Cangas, Carballo, Chantada, Compostela, Corcubión, Ferrol, Foz, Lugo, Manzaneda, Melide, Monforte de Lemos, Noia, O Barco de Valdeorras, O Carballiño, O Porriño, Ourense, Ponteareas, Pontedeume, Pontevedra, Redondela, Ribadavia, Ribeira, Silleda, Val Miñor, Verín, Viana do Bolo, Vigo, Vilagarcía, Vilalba e Viveiro. A Coordinadora Galega con Palestina acumula xa 15 meses de mobilizacións, que combina coa organización doutro tipo de encontros. Durante as actuais semanas están a realizar charlas en distintos puntos do territorio co exportavoz en Europa da Fronte Popular para a Liberación de Palestina, Fayez Badawi, para falar da situación xeopolítica actual.

"HIPOCRISÍA INTERNACIONAL"

Óscar Valadares, portavoz de Mar de Lumes, dirixiu as súas críticas cara á "hipocrisía internacional e a impunidade absoluta coa que opera Israel". "Estamos seguros de que se os Estados Unidos e os membros da Unión Europea non lle desen a cobertura que lle dan, non estariamos diante dun xenocidio como o que estamos a asistir", reforzouse na súa posición. Ánxela Gipinni reiterou esta denuncia respecto dos gobernos internacionais, español e galego "polo súa inacción ou silencio ou, porque se hai palabras, son baleiras sen ningún tipo de consecuencia para Israel".

Óscar Valadares, de Mar de Lumes; Ánxela Gipinni, de Galiza con Palestina, e Sami Ashour, da Asocaición Galaico Árabe, na presentación das mobilizacións por Palestina do 31 de marzo | Fonte: Europa Press