O ministro Puente subliña a influencia do Goberno central para incluír Galicia no Corredor Atlántico
O senador do PP José Manuel Balseiro preguntou a Puente "pola razón pola que a maior parte da provincia de Lugo queda fóra do Corredor Atlántico de mercancias ferroviarias"
Por Europa Press / Redacción | MADRID | 25/03/2025 | Actualizada ás 19:12
O ministro de Transportes e Mobilidade Urbana, Óscar Puente, replicou ás queixas do PP no Senado porque "a maior parte" de Lugo quede fóra do Corredor Atlántico reivindicando a "influencia" do Goberno de Pedro Sánchez para que Galicia forme parte desta conexión ferroviaria.
Na sesión de control ao Goberno no Senado, o senador do PP José Manuel Balseiro preguntou a Puente "pola razón pola que a maior parte da provincia de Lugo queda fóra do Corredor Atlántico de mercancias ferroviarias".
Ante isto, Puente lembrou que a definición do Corredor Atlántico faina a Unión Europea e é o Goberno central o que pode influír, polo que puxo en valor a "influencia" do Executivo de Pedro Sánchez para que se incluíse Galicia nesta conexión.
En calquera caso, o ministro de Transportes defendeu que o Corredor Atlántico si que pasa pola provincia de Lugo, por Monforte, algo que non terminou de convencer ao senador do PP, que seguiu insistindo en que o Corredor inclúa máis parte do territorio da provincia de Lugo.
"Que ten con Lugo?", preguntou o senador do PP, ao que Puente respondeu ironicamente con que o seu pai é desta provincia galega e que el recibiu o premio a veciño do ano. "E vostedes nin acudiron", sostivo.
