A Plataforma SOS Sanidade Pública mobilizará buses desde Ferrol para a manifestación do 6 de abril en Santiago

A Plataforma SOS Sanidade Pública fretará autobuses desde Ferrol, Narón e outros puntos da comarca para que a cidadanía poida acudir á manifestación convocada para o próximo 6 de abril en Santiago, co obxectivo de "esixir melloras" no sistema sanitario público galego.

Así o manifestou unha das coordinadoras da plataforma na comarca, Susana Alaniz, nunha rolda de prensa ofrecida este martes no Concello de Ferrol en compañía de todos os grupos da oposición da cidade: PSOE, BNG e Ferrol en Común.

Alaniz acusou á Xunta "antes con Feijóo e agora con Rueda", de "desmantelar o sistema público mentres defenden que funciona mellor que nunca". Neste contexto, pediu "solucionar os problemas en atención primaria" porque faltan "persoal e recursos" nos centros de saúde e puntos de atención continuada (PAC).

A isto sumou a petición de poder realizar "consultas presenciais e non telefónicas", así como de poder ser consultado por un médico en 24 ou 48 horas "tras pedir cita".

Alaniz tamén denunciou que hai "escaseza e unha situación crítica de pediatras, obrigando a familias a desprazarse longas distancias"

No plano da saúde mental, lamentou a "insuficiente atención psicolóxica e psiquiátrica, especialmente en mozas", sobre todo afectados de TEA e depresión, ademais de intentos de suicidio.

LISTAS DE ESPERA

Ademais, a coordinadora de SOS Sanidade Pública de Ferrolterra declarou que o Sergas acomete "recortes en hospitais comarcais e externalización a privados", mentres que "as listas de espera son escandalosas, con ata 60 ou 70 días para cirurxías".

A plataforma porá a disposición da cidadanía varios autobuses Ferrol, Narón e outros puntos da comarca, ademais de pór en marcha estes días unha campaña de información con "repartición de dípticos, mesas informativas e apoio de asociacións de pacientes e partidos políticos".

ENTIDADES SEN ÁNIMO DE LUCRO

O portavoz de Ferrol en Común, Jorge Suárez, que falou en nome dos grupos políticos, criticou a degradación dos servizos públicos de saúde na comarca de Ferrolterra e esixiu un maior investimento e compromiso político.

Así, detallou que "servizos esenciais, como a atención a drogodependentes" que realiza a Asociación Ferrolá de Drogodependencias (Asfedro), "e á saúde mental infantil", por parte da Asociación de Pais e Nais de Nenos e Meniñas Con Problemas Psico Sociais (Aspaneps), "dependen de entidades sen ánimo de lucro e subvencións, sen integrarse no sistema público do Sergas".

Suárez tamén dixo que "faltan recursos en atención primaria", con listas de espera excesivas, de "ata once meses para especialidades como urología ou glaucoma", e que moitos pacientes son "derivados a hospitais privados", como Grupo Ribeira na cidade, o que "encarece o sistema e atrasa diagnósticos".

Por último, Suárez denunciou que "falta de vontade política para mellorar a sanidade pública, priorizando proxectos de infraestrutura sobre recursos humanos e materiais", o que lle valeu para chamar á mobilización, á vez que criticou que o goberno local --do PP-- "non facilite recursos" como o custo dos autobuses para as manifestacións, "a pesar das demandas reiteradas".