Os viticultores acusan "aos dous lados do Atlántico" polo establecemento de aranceis ao viño galego
A asociación galega de viticultura alerta que a imposición de novos aranceis suporá un aumento de prezos "enorme" do consumidor final e reducirá a competitividade fronte a viños locais
Por Europa Press / Redacción | SANTIAGO DE COMPOSTELA | 28/03/2025 | Actualizada ás 13:12
A asociación galega de viticultura ve "culpables a ambos os dous lados do Atlántico" pola "disputa comercial" que supón o establecemento de novos aranceis ao viño galego en Estados Unidos.
Neste escenario, constata que o viño galego "afronta un novo obstáculo na súa exportación a Estados Unidos" e avisa de que a medida "pode provocar a expulsión" do mercado estadounidense.
Ao seu xuízo, "non é un capricho presidencial de Donald Trump, senón unha clara e deseñada estratexia das elites políticas dos Estados Unidos".
Neste sentido, considera que a decisión "vén motivada pola resposta da Unión Europea a un conflito comercial previo", xa que Bruxelas "optou por defender o whisky europeo, promovendo un incremento dos aranceis do whisky estadounidense".
"En resposta, Whashington decantouse por castigar un dos produtos estrela da exportación europea: o viño", lamenta a asociación.
Así, considera que "este intercambio de golpes entre bloques comerciais non só afecta a grandes potencias vitivinícolas como Francia ou Italia, senón que impacta directamente nas adegas galegas, que nos últimos anos lograron abrirse paso en Estados Unidos grazas á diferenciación e calidade dos viños".
A imposición de novos aranceis suporá un aumento de prezos "enorme" do consumidor final e reducirá a competitividade fronte a viños locais, alerta.
O sector galego, incide, "non pode ser moeda de cambio para a loita comercial entre Estados Unidos e a Unión Europea". Por iso pide como "fundamental" que a UE "negocie unha solución equilibrada que non prexudique ao viño". "De non facelo, moitas adegas galegas terán serios problemas para vender os seus viños, ao desaparecer unha fonte de vendas tan importante", conclúe.
