Nova división no nacionalismo galego
Destacados militantes de Compromiso por Galicia apoiarán á Marea nas vindeiras autonómicas. Son preto dun cento de persoas que abandonan a disciplina de CxG e denuncian un “xiro dereitista e cara ao nacionalismo esencialista” da actual executiva. Entre eles destacan o ex senador co BNG Xosé Manuel Pérez Bouza, Jéssica Fernández Polo (portavoz municipal de Xuntos por As Pontes), Paulo Carlos López, Xulia Guntín, Henrique Monteagudo ou Xosé Antón López.
Por Galicia Confidencial | Compostela | 19/04/2016 | Actualizada ás 16:39
Destacados militantes de Compromiso por Galicia (CxG) anunciaron a súa baixa da formación tras a convención do pasado domingo que decidiu por ampla maioría presentarse en solitario as elección galegas.
Entre estas persoas, que xa asinaron o manifesto “Coa Marea. Por Galicia”, están o ex senador polo BNG Xosé Manuel Pérez Bouza, Jéssica Fernández Polo (portavoz municipal de Xuntos por As Pontes), Paulo Carlos López, Xulia Guntín, Henrique Monteagudo, Xosé Antón López, Denís Fernández Méndez, Iván Marrube ou o escritor Xabier López, entre outros, que están en desacordo coa decisión de CxG de concorrer en solitario. “Está marchando o sector máis intelectual da formación e queda xente que se afiliou nas últimas semanas e que non ten nada que ver coa esencia coa que se creou esta formación”, apuntan as fontes consultadas.
Neste manifesto deixan claro que, ao seu entender, na convención do pasado domingo “tomouse non só unha decisión táctica desacertada, senón que tamén se acentuou unha viraxe estratéxica e mesmo ideolóxica cara a posicións centristas e propias dun nacionalismo esencialista, apartándose do espírito e dos documentos fundacionais de Compromiso”.
En todo caso, tamén recoñecen que o rumbo apoiado por unha maioría de compañeiros e compañeiras aos que lle desexamos fraternalmente moita sorte”. Este grupo de persoas, de entorno o cento, destaca que “non pretende crear unha nova estrutura organizativa que participe do eterno baile de siglas do nacionalismo galego”, senón “contribuír ao proceso en marcha de construción dunha candidatura popular ampla e transversal arredor da Marea”.
Por iso, mostran o seu apoia á marea cidadán e consideran que “a cidadanía galega leva tempo indicando cal é o camiño para rematar cos gobernos da dereita e coa hexemonía bipartidista, de xeito especialmente nidio nas eleccións municipais e nas xerais de 2015” na liña do que defenderan moitos na convención de CxG no pasado outubro, na que xa pediran o apoio para En Marea.
“O noso compromiso será integrármonos individualmente desde o ámbito local de cadaquén nas distintas mareas e candidaturas de converxencia, nas que algúns xa estamos integrados de feito desde hai certo tempo. A nivel nacional galego, participaremos, tamén individualmente, na construción desa alternativa –que xa está en marcha– e que precisa e reclama a maioría social do noso país”, recolle o manifesto.
E, puntualizan que, ese apoio será “desde o galeguismo e o nacionalismo non excluíntes nin exclusivistas, defendendo a autoorganización das forzas políticas galegas, coas miras postas no progreso do noso país, buscando a colaboración entre persoas e forzas coas que temos coincidencias en aspectos fundamentais e reforzando o noso compromiso cos intereses da maioría da nosa sociedade, duramente castigada polas políticas austeritarias”, aseguran.
Con esta saída, o nacionalismo galego volve quedar dividido. Unha división que comezou tras a Asemblea de Amio do BNG. De aí xurdiron dúas grandes formacións, Encontro Irmandiño, que logo derivou en Anova e CxG. A primeira tivo unha excisión hai dous anos, da que xurdiu Cerna. A segunda acaba de ter a súa división. Pero, polo camiño, o BNG, tivo novas baixas logo da última asemblea en Compostela, desta volta do sector de Abrente, coa saída de dous referentes históricos como o ex voceiro nacional e ex vicepresidente da Xunta, Anxo Quintana, e o ex voceiro parlamentario, Carlos Aymerich.
