A Xunta cre que as sentenzas do Supremo avalan a reactivación do seu plan eólico

A conselleira de Medio Ambiente e Cambio Climático, Ángeles Vázquez, trasladou este mércores a súa "tranquilidade" tras a emisión dos últimos "catro pronunciamentos do Supremo que avalan o bo facer dos técnicos da Xunta de Galicia". O último fallo, coñecido o venres pasado e en referencia ao parque eólico de Campelo, confirmou a legalidade do acordo administrativo que autorizou o proxecto, entre os concellos de Coristanco e Santa Comba, na provincia da Coruña.

A representante da Xunta cre que estas "non son sentenzas calquera", xa que "poden arrastrar, ou podían arrastrar absolutamente toda a tramitación", como expresou no seu discurso de clausura este mércores no 'I Encontro de grandes empresas da Alianza Galega polo Clima'.

Por tanto, para Vázquez estes fallos "avalan o seu criterio [o da Xunta], avalan o seu rigor e avalan que se cumpre estritamente a lei". Este "rigor" esténdeo a unha DIA (Declaración de Impacto Ambiental) --como a emitida sobre Altri hai case dúas semanas-- ou a unha autorización, pois defende que se aplica "o mesmo para todas as empresas".

Muíños eólicos | Fonte: EDP - Arquivo