Rueda di que se podería financiar a Altri se a Xunta xestionara os fondos Next Generation

A Xunta financiaría a megacelulosa Altri se puidera xestionar os Fondos Next Generation. A multinacional portuguesa pide 250 millóns destes fondos para iniciar as súas actividades en Galicia tras concederlle a Xunta os permisos medioambientais. Pero a xestión deses cartos non depende da Xunta, senón do Goberno central.

Por iso, este martes, o presidente galego criticou ao Goberno central por non permitir que sexan as autonomías as que xesitonen eses fondos. "Dixéronnos que había que promocionar proxectos estratéxicos porque ían ter financiamento", lembrou. Pero como non os poden xestionar, a Xunta, dixo, non vai financiar cos cartos públicos dos galegos eses 250 millóns. "Non aportamos a outros proxectos tractores e non o imos facer con este", engadiu. "Iso depende do Goberno central e agardamos que traten este proxecto como tratan a outros aos que lle dan axudas", engadiu.

Rueda aproveitou para criticar a socialistas e nacionalistas aos que botou en cara a súa oposición a esta megacelulosa "cando coñecían perfectamente o que se ía facer en Galicia" cando votaron a favor da súa instalación no noso país. "Coñecían o proxecto e o argumento que utilizan xa se desmontou", indicou.

Por outra banda, o presidente galego evitou valorar as declaracións do líder do PSdeG, Xosé Ramón Besteiro, que defendeu o proxecto de extracción de litio na mina de Doade, en Beariz, porque é un proxecto "estratéxico" para a Unión Europea, mentres que "a celulosa --de Altri-- non o é". "Non teño o coñecemento do señor Besteiro sobre o que é estratéxico ou non", respondeu Rueda.

En todo caso, criticou ao líder socialista por desacreditar a opinión dos técnicos da Xunta. "É dificil entendelo polos cambios de opinión que ten", ironizou. "En todo caso lembro que o BNG xa dixo que tampouco quere a mina de Doade e a min tamén me gustaría saber se Besteiro apoia este proxecto ou non", engadiu.