Detidos dous homes como presuntos autores de roubos con forza en Marín
Os axentes, "ante a falta de colaboración do morador" do inmoble, necesitaron empregar a forza para acceder ao interior da vivenda
Por E.P. | SANTIAGO DE COMPOSTELA | 01/04/2025 | Actualizada ás 18:29
A Policía Nacional da comisaría local de Marín detivo o pasado xoves a dous homes como presuntos autores de seis delitos de roubo con forza de distinto tipo ocorridos na localidade pontevedresa durante os últimos meses.
Segundo detallou a Policía, os axentes levaron a cabo unha investigación "laboriosa" ao tratarse de roubos en zonas rurais, pouco poboadas e sempre de madrugada. Ademais, explicou que os presuntos ladróns non só se limitaban a roubar, senón que nalgunha das vivendas chegaron mesmo a cociñar e a celebrar festas.
Para tratar de identificar os autores estableceuse un dispositivo que concluíu coa detención destes dous homes como presuntos autores dun total de seis roubos con forza.
Así, realizouse un rexistro no domicilio dun dos investigados, nunha coñecida barriada de Marín, na mañá do xoves. Os axentes, "ante a falta de colaboración do morador" do inmoble, necesitaron empregar a forza para acceder ao interior da vivenda.
Foi neste rexistro no que se localizaron numerosos efectos subtraídos nos roubos ocasionados en vivendas da zona, a maioría en segundas residencias, galpóns e bares situados na zona rural de Marín.
Tal e como detallou a Policía, os efectos subtraídos son moi variados, desde diferentes aveños "con boa aceptación no mercado de segunda man", até un kaiak ou máquinas cortacésped.
Tras ser trasladados a dependencias policiais levou a cabo a tramitación das correspondentes dilixencias policiais que finalmente foron remitidas aos Xulgados de Marín.
