Sanxenxo, o destino preferido do Borbón Juan Carlos I despois de Abu Dabi
Chega este martes para participar noutra regata.
Por Europa Press / Redacción | SANTIAGO DE COMPOSTELA | 22/04/2025 | Actualizada ás 11:39
O rei emérito Juan Carlos I chegará a tarde deste martes a Sanxenxo, no que será a súa primeira viaxe deste ano a Galicia, para participar nas regatas que se celebran o fin de semana no municipio pontevedrés.
Así o sinalaron fontes da súa contorna consultadas por Europa Press, que detallaron que está previsto que o pai de Felipe VI compita a bordo do 'Bribón' na regata que se disputará o sábado e o domingo na ría de Pontevedra. Esta será a primeira vez que Juan Carlos I viaxe a Sanxenxo este ano xa que, na regata de marzo á que estaba previsto que acudise cancelou a súa asistencia tan só uns días antes.
Esta viaxe acontece días despois de que se coñecese a demanda do rei emérito ao expresidente de Cantabria Miguel Ángel Revilla por unhas declaracións "inxuriosas" que realizaría en diversos medios de comunicación desde maio de 2022 a xaneiro de 2025. O acto de conciliación, ao que non están obrigados a acudir xa que pode resolverse a través das defensas de ambos, está datado para o venres 16 de maio, na sala de vistas número 10 da sede xudicial das Salesas, en Santander.
