O Parlamento pide que se adxudiquen xa os helicópteros do 061 tras un mes sen o de Santiago

O Parlamento galego aprobou por unanimidade reclamar á Xunta que realice, polo procedemento de urxencia, un novo concurso para a concesión do servizo de helicópteros sanitarios da Fundación Pública Urxencias Sanitarias-061. Cabe lembrar que a aeronave con base en Santiago leva 32 días inoperativa por unha avaría e que só está dispoñible a de Ourense.

Trátase dunha iniciativa do BNG, que contou co voto a favor dos restantes grupos (PP, PSdeG e Democracia Ourensana), defendida este martes na comisión 5ª, de sanidade, política social e emprego. En concreto, esta proposición non de lei reclama que se volva a adxudicar o servizo e que se tomen "todas as medidas" para que a concesión non recaia en Eliance, que é a empresa actual e que xa tivo que afrontar varias multas por incumprimentos do contrato.

Ademais, a iniciativa do BNG pide á Xunta que esixa a esta empresa que, mentres non se realice a nova adxudicación, cumpra o establecido nos pregos de licitación e que, por tanto, non só cubra "a totalidade do horario" do servizo, "entre o orto e o ocaso"; senón que tamén teña un helicóptero de reposto.

Por outra banda, quedou aprobada outra iniciativa por unanimidade, nesta ocasión do PP pero cunha transacción pactada co BNG, para fortalecer o cooperativismo como un "alicerce crave" da economía galega. Neste sentido, pide que leste mesmo ano apróbese unha nova lei de cooperativas que conte "con todos os axentes implicados".

Helicóptero do 061 | Fonte: Arquivo