Colexios con mínima afluencia e escolas infantís que teñen que recorrer aos 'potitos' para alimentar aos bebés

A dificultade nas comunicacións que acompañou ao apagamento eléctrico que afectou este luns á Península Ibérica, e do que parte do territorio non se recuperou ata as primeiras horas deste martes, traduciuse en confusión para as familias e o persoal dos centros educativos e as escolas infantís da comunidade, sobre todo nas primeiras horas do día. E é que, nunha comparecencia convocada pouco antes das 21.00 horas, o presidente galego, Alfonso Rueda, anunciou na pasada xornada que se suspendían as clases nos centros educativos e que tampouco habería actividade nas escolas infantís.

A determinación da Xunta, en parte pola rede extensa de transporte escolar e con ánimo de aforrar combustible, era pechar os centros. A decisión adoptouse cando se declarou o nivel 2 de emerxencia e aínda tiña o mando a Administración autonómica, pero pouco despois activouse o nivel 3 e a coordinación pasou a mans do Goberno. A directriz foi que, aínda sen actividade lectiva, reabrisen os centros. Nesta conxuntura e dado que fallaban os teléfonos móbiles, houbo profesores, algúns consultados por Europa Press, que non recibiron ata esta mañá as distintas directrices e practicamente á vez: a da pasada noite que determinaba a suspensión da actividade e a instrución que esta mañá clarificaba que debían estar abertos.

O mesmo pasou coas familias: houbo centros privados e concertados que avisaron ás familias de que os centros funcionarían e mantiveron mesmo servizos complementarios, como o de comedor. Por exemplo, colexios privados, como Peleteiro, funcionaron con normalidade, incluído servizos como comedor e transporte escolar. Non entanto, a dirección tomou a decisión de aprazar ao venres os exames de Secundaria que estaban previstos para a xornada deste martes. Pola súa banda, a rede pública autonómica notificou a apertura, sen transporte escolar nin servizo de comedor nos casos correspondentes, dos centros a través da aplicación 'Abalar', vía habitual de comunicación coas familias. Pero houbo o mesmo problema, as nais e pais recibiron todas as notificacións á vez esta mañá. Os equipos directivos si se desprazaron aos seus postos de traballo.

INCIDENCIAS PUNTUAIS E AFLUENCIA LIMITADA

Isto non impediu que houbese incidencias puntuais nalgúns casos na entrada dos menores. Xa advertira a Xunta, á vez que pedía comprensión, que podía haber dificultades debido ás dificultades para comunicar as instrucións. En todo caso, a confusión conduciu a que unha gran parte das familias que tiveron outra alternativa --como avós ou outras vías dentro da rede familiar-- optasen por non desprazar aos seus fillos e fillas aos colexios, polo que a pauta, segundo fontes ligadas a distintos colexios consultadas por Europa Press, foi que foron ás instalacións educativas "unha minoría" --menos do 3 %, segundo a Xunta--. Sindicatos como a CIG reprobaron unha situación que cualificaron de "caos" e que atribuíron a "mala xestión" e "informacións contraditorias" da Administración.

ESCOLAS INFANTÍS

Maior confusión houbo, se cabe, nas escolas infantís, dado que a directriz de reapertura non chegou aos equipos directivos das mesmas ata avanzada a mañá. Houbo pais e nais que se atoparon carteis de "escola pechada ata este mércores" e notificacións de directoras que afirmaban que non se renovaría a actividade ata o día seguinte. A orde da Administración galega era que as escolas infantís da rede pública autonómica reabrisen na medida do posible ao longo da xornada, pero a súa loxística é, se cabe, máis complicada que a dos colexios, cun punto crave, o da alimentación dos bebés. Nesta conxuntura, familias consultadas por Europa Press indicaron que as súas gardarías, que reabriron esta mañá, optaron por habilitar un "menú de emerxencia", de crema e espaguetis no caso da compostelá de Tras Parlamento, por exemplo. Noutras, a opción máis factible, segundo se lle comunicou aos proxenitores, foron os 'potitos'. Segundo a Xunta, as escolas infantís da rede pública autonómica tiveron unha asistencia do alumnado que roldou o 3,5 %.

A XUNTA FALA DE MENOS DUN 2,5 % DE AFLUENCIA EN COLEXIOS

O conselleiro de Presidencia, Xustiza e Deportes, Diego Calvo, rebaixou a "menos do 3 %" os alumnos que acudiron este martes aos centros educativos de Galicia. "Como saben vostedes, estaban abertos a disposición de que se hai algún pai que, como recurso de conciliación, quere deixar alí aos seus fillos, pode facelo. Menos do 3 % do alumnado acudiu aos centros, por tanto, utilizáronse bastante pouco", agregou. Calvo ratificou que os hospitais eran "o principal punto de preocupación desde a pasada xornada" e recalcou que funcionan desde a mañá con subministración eléctrica, sen ter que tirar dos xeradores. 

Con todo, minutos despois falou de novas cifras que seguían reducindo o total do alumnado que acudiu aos centros ata o 2,5 %, ao redor de 8.000 alumnos. Os servizos de Inspección Educativa estiveron en contacto con eles durante toda a mañá para facilitar unha progresiva volta á normalidade. Aqueles nos que á primeira hora se produciu algún tipo de confusión polas limitacións nas comunicacións durante o apagamento foron atendidos polos servizos técnicos da Consellería de Educación para facilitar a apertura. Do total dos 1.076 centros públicos, unicamente houbo incidencias en menos dun centenar, segundo indicaron dende a Xunta, a maioría por falta de subministración eléctrica xa que este non volveu ao mesmo tempo en toda Galicia.

GALICIA PENDENTE DE 'DESESCALAR' A NIVEL 2

Calvo tamén ratificou que, na liña do anunciado polo presidente galego, Alfonso Rueda, na videoconferencia co Ministerio das oito comunidades en nivel 3 de emerxencia, a Xunta (do mesmo xeito que outras autonomías) manifestou o seu desexo de 'desescalar' ao nivel 2. Este paso permitiría á Xunta retomar o mando e dar directrices definitivas de cara á próxima xornada, precisamente, en cuestións como os centros escolares. A Xunta, pendente de que resolva o Goberno esta tarde, basea a súa petición na "melloría" da situación e confía en que a evolución siga sendo favorable "no que queda de día".