Arrincan as declaracións da Operación Pulpo, o caso que fixo dimitir a Besteiro
O ex secretario xeral do PSdeG tivo que deixar o seu posto ao ser investigado por suborno, prevaricación, tráfico de influencias, fraude ás administracións públicas, fraude de subvencións e un delito continuado de malversación.
Por Galicia Confidencial | Lugo | 10/05/2016 | Actualizada ás 09:00
A xuíza Pilar de Lara comeza este martes a toma de declaracións dos imputados na coñecida como Operación Pulpo e que supuxo a dimisión do ex secretario xeral do PSdeG, José Ramón Besteiro. O xefe de Protocolo da Deputación de Lugo será o primeiro dos sete investigados en declarar no Xulgado de Instrución Número 1 de Lugo, aínda que os interrogatorios continuarán ao longo de toda a semana.
Para o mércores está prevista a comparecencia de Gómez Besteiro, que será o primeiro en declarar, no seu caso, como investigado por suborno, prevaricación, tráfico de influencias, fraude ás administracións públicas, fraude de subvencións e un delito continuado de malversación, tamén prestará declaración outra funcionaria do departamento de comunicación e o empresario Raúl López.
Ao día seguinte pasarán polo xulgado o secretario adxunto, a interventora e o asesor de fondos europeos da Deputación de Lugo.
A titular do Xulgado de Instrución número 1 de Lugo, Pilar de de Lara, investiga na chamada Operación Pulpo a existencia dun "armazón" na Deputación de Lugo para "manipular concursos", outorgar de forma "fraudulenta" subvencións e "desviación de caudais públicos".
Nun auto precisa que "na comisión de tales delitos participaría un elevado número de autoridades e funcionarios, pertencentes á Deputación de Lugo, quen coordinadamente e de forma continuada no tempo poderían, presuntamente, perpetrar un cúmulo de irregularidades con posible encaixe penal".
A xuíza puxo a lupa sobre o programa de visitas guiadas KM0, os contratos coas empresas de Raúl López, as subvencións a entidades deportivas presididas por este empresario, os chamados gastos sociais da institución e o acceso a unha praza de funcionaria de quen foi xefa de comunicación da Deputación de Lugo.
Sen embargo, o organismo provincial lembroulle á xuíza que moitas das axudas que investiga foron outorgadas na época de Cacharro Pardo, do PP, como presidente deste ente, e destacou que os gastos sociais eran para o persoal funcionario desta entidade.
