Galicia rexistra 10 dos 237 casos confirmados de infección por virus Zika en España

O número de casos diagnosticados en España do virus do Zika aumentou esta semana de 229 a 237, deles 38 son mulleres que estaban embarazadas no momento da toma das mostras, segundo os datos da Rede Nacional de Vixilancia Epidemiolóxica notificados ao Ministerio de Sanidade, Servizos Sociais e Igualdade. Do total, dez corresponden a Galicia.

Segundo informa o Ministerior de Sanidade, que en colaboración co Instituto de Saúde Carlos III e as comunidades estableceu unha vixilancia de casos importados de enfermidade, 91 dos casos confirmados de infección por virus Zika notificáronse en Cataluña, 60 en Madrid, 15 en Aragón, 14 en Castilla e León, 10 en Galicia, 9 na Comunidade Valenciana, 7 en Andalucía, 6 en La Rioja, 6 no País Vasco, 5 en Navarra, 5 en Baleares, 4 en Canarias, 2 en Asturias, 2 en Murcia e 1 en Castilla-La Mancha.

A Consellería de Sanidade, con data 8 de agosto, confirmara dez casos de zika en Galicia, nove deles en adultos e un conxénito. Deles, catro casos corresponden a mulleres embarazadas e, segundo engade, todos adquiriron a infección nunha área afectada.

Todos eles, segundo o Ministerio, foron detectados en persoas procedentes ou que visitaran países afectados, salvo un caso autóctono de transmisión por vía sexual na Comunidade de Madrid (notificado o pasado 1 de xullo), rexión na que non se detectou a presenza do mosquito 'Aedes albopictus'. En dous casos detectouse Zika conxénito; en ambas as dúas ocasións as nais infectáronse en zonas de risco.

PROTOCOLO DE VIXILANCIA

Ante a epidemia por virus Zika na Rexión das Américas, o Ministerio de Sanidade, Servizos Sociais e Igualdade, en colaboración co Instituto de Saúde Carlos III e as comunidades autónomas, estableceu unha vixilancia de casos importados de enfermidade por virus Zika.

Así mesmo, a primeiros de ano o Ministerio e os gobernos autonómicos acordaron na Comisión de Saúde Pública do Sistema Nacional de Saúde (SNS) a aprobación dun protocolo de vixilancia epidemiolóxica do Zika e un plan de preparación e resposta para estas e outras enfermidades transmitidas por mosquitos, que en abril foi ratificado no Consello Interterritorial.

Entre outras cuestións, recoméndase a calquera persoa que estivese nalgunha zona na que exista o virus pospoñer oito semanas dende o seu regreso as relacións sexuais sen protección con mulleres que estean embarazadas ou teñan intención de selo, para evitar un posible contaxio a través do seme e dado o posible risco de microcefalia fetal que aínda non se confirmou.

As mulleres embarazadas que viaxaran a países de risco por virus Zika someteranse a análise de sangue e ouriños se ao regresar a España presentan algunha sintomatología indicativa da infección, segundo o protocolo de seguimento acordado coa Sociedade Española de Xinecoloxía e Obstetricia (SEGO).

E en caso de confirmarse a presenza do virus, realizaranse ecografías seriadas para controlar o crecemento e, sobre todo, a morfoloxía fetal cada dous semanas, sendo imprescindible o concurso de obstetras avanzados no diagnóstico ecográfico prenatal e na sospeita diagnóstica de infección fetal.