Lea xudicial en Ourense pola candidatura de En Marea
O PP denuncia a David Rodríguez ante a Xunta electoral porque di que non presentou a renuncia como rexedor a tempo. Luís Villares acusa aos populares de “fuxir da democracia” porque “temen” unha derrota en Ourense.
Por Galicia Confidencial | Ourense | 02/09/2016 | Actualizada ás 09:29
O Partido Popular impugnou a lista de En Marea en Ourense ao entender que o número dous desa candidatura, o alcalde de Manzaneda, David Rodríguez Estévez, non presentou a súa renuncia como rexedor no prazo previsto que marca a Lei Orgánica Electoral.
Este partido di que Rodríguez presentou a súa renuncia ao cargo o día 29 de agosto nun pleno, cando o prazo para emendar posibles erros das listas electorais remataba o día 28 de agosto. Unha denuncia que, desde en Marea, consideran unha “maniobra política”.
Así, o candidato de En marea, Luís Villares criticou que o PPdeG “foxe da democracia porque van verder tamén en Ourense". "Esta é a bancarrota ética de Baltar, nunha provincia onde hai unha monarquía baltárica que decide a dedo as listas, veñen a impugnar as dos demais. Saben que a competencia vailles ser letal", engadiu.
Durante a súa visita a Sarria, e en resposta a preguntas dos xornalistas, o candidato de En Marea á presidencia da Xunta asegurou que, desde o punto de vista xudicial, a impugnación da lista de Ourense por parte do Partido Popular non ten percorrido por dúas razóns. “Primeiro, porque a interpretación da normativa electoral sempre é antiformalista, no sentido de que se busca o efecto de participación electoral, hai unha vontade política de renunciar e está constatada e metida por rexistro con anterioridade a que o caso fose estudado pola Xunta Electoral”, apuntou.
E, en segundo lugar, “non se pode prexudicar a un concello pequeno que non ten secretario interventor de forma habitual precisamente pola carencia de medios” á que, segundo dixo, os somete goberno Feijóo. Por todo isto, Villares asegurou que “a xunta electoral non vai ter ningunha dificultade en apreciar estas condicións e a candidatura de Ánxeles Cuña e neste caso David Rodríguez será a gañadora nos vindeiros comicios na provincia de Ourense”.
