Malestar en En Marea pola guerra interna entre Iglesias e Errejón

A batalla interna que manteñen Pablo Iglesias e Íñigo Errejón polo control de Podemos en Madrid e que escenificaron públicamente este martes a través das redes sociais non gustou en En Marea. Destacados dirixentes desta confluencia, incluso da propia formación morada, recoñecen que este tipo de tira puxas persoais non axuda na recta final da campaña galega.

Pablo Iglesias votando, con Íñigo Errejón, nunha imaxe do seu twitter oficial

Precisamente, foi a intervención de Pablo Iglesias nun mitin en Galicia o que motivou a reacción de Errejón. "Xa nos chegan a nós coa mala campaña informativa que nós están facendo como para que veñan Iglesias e Errejón a botar máis leña", apunta un dirixente consultado.

Ademais, apuntan que este tipo de enfrontamentos están sendo utilizados polos "medios afíns ao PP" para tentar dividir á coalición e "influír no electorado.

O propio alcalde da Coruña, Xulio Ferreiro, tivo que saír ao paso desta situación e, aínda que cualificou como "debate san" o enfrontamento entre Iglesias e Errejón, chamou a "centrarse" na campaña electoral porque "canto menos nos desviemos, mellor".

Así, en declaracións aos medios, subliñou a importancia de "centrarse" na recta final da campaña electoral para as eleccións autonómicas galegas e considera que "non é un gran problema" o debate entre os dous membros de Podemos, ao tempo que defende que a discrepancia de ideas "sempre é sa".

Neste sentido, Ferreiro referiuse a outras discrepancias xurdidas tanto nas filas populares coma nas socialistas, destacando o asunto de Rita Barberá ou a configuración de listas no PSdeG.