Antártica, libre e salvaxe
Un trailer amosa a faciana máis amable da Antártida, un continente case virxe. Foi realizado por Xurxo Gago, científico galego que estivo traballando neste continente.
- Como desprazarse 15 km na Antártida con media tonelada de equipos científicos
- “Aos dez minutos de ter as mans sen luvas para traballar tes sensación de conxelación”
Por Galicia Confidencial | Antártida | 30/10/2016 | Actualizada ás 11:00
Axena presenta o trailer de 'Antártica, libre e salvaxe', unha peza audiovisual que forma parte da serie multimedia Nunatak (I e II), da que xa demos conta no GC, e que narra as aventuras e desventuras dun grupo de científicos que estudan as plantas que viven nos ambientes máis extremos do planeta.
Na actualidade, existen moitos intereses económicos e políticos sobre a Antártida, o último continente salvaxe, onde aínda a man do home non o cambiou todo. O Tratado Antártico establece que a Antártica é patrimonio da humanidade, libre de fins militares e económicos por parte de países e entidades privadas.
A Antártica é o continente máis frío, máis seco e máis inhóspito do noso planeta, e está moi ameazado polo cambio climático que pode cambiar drasticamente todo o seu ambiente. Alí, un grupo de científicos, entre o que se atopaba o galego Xurxo Gago, estiveron a estudar o efecto do incremento da temperatura nas súas plantas nativas utilizando cámaras abertas de quecemento, as cales aumentan a temperatura uns 2-3 graos nos días asollados. “O que aprendamos na Antártica axudaranos a entender os efectos do cambio climático no resto de rexións polares do mundo”, apunta.
Froito dese traballo acaban de presentar unha pequena peza audiovisual que pretende chamar a atención sobre a riqueza que atesoura esta parte do planeta. “Facer ciencia na Antártica non é unha tarefa sinxela, requírese unha capacidade loxística enorme, e unha importantísima colaboración internacional fundamental para poder obter resultados exitosos no continente máis extremo do mundo”, suliña.
