Investigadores galegos propoñen novos métodos para diagnosticar e tratar o cancro de próstata
Un equipo da Universidade da Coruña vén de publicar un artigo no que expón unha metodoloxía baseada en algoritmos computacionais para predicir patróns de crecemento de tumores.
Por Galicia Confidencial | A Coruña | 30/11/2016 | Actualizada ás 13:36
Unha nova metodoloxía para mellorar a diagnose e a planificación do tratamento do cancro de próstata baseada en algoritmos computacionais. Esta é, basicamente, a proposta que fai o equipo de investigación do profesor da Universidade da Coruña (UDC) Héctor Gómez, que vén de publicar nun artigo científico na revista Proceedings of the National Academy of Sciences (PNAS), a publicación multidisciplinar máis prestixiosa despois de Science e Nature, e unha das máis citadas en todos os campos da ciencia.
A idea está baseada nunha concepción computacional da medicina personalizada. Amosa como a imaxe médica, en combinación con algoritmos computacionais, pode predicir patróns de crecemento de tumores de próstata.
O modelo úsase para realizar a primeira simulación numérica a escala de tecido na anatomía dunha próstata extraída de imaxes médicas. O traballo é totalmente multidisciplinar e resulta de interese para urólogos, informáticos, matemáticos e enxeñeiros biomédicos, entre outros.
Héctor Gómez, profesor da área de Matemática aplicada na ETS. de Enxeñaría de Camiños, Canais e Portos, conseguiu en 2012 a distinción Starting Grant do European Research Council, dotado con 1,4 millóns de euros para desenvolver o proxecto de investigación 'MuSIC. Modelado e simulación do crecemento do cancro', informa a UDC.
