En Marea xa desautorizou a moción en Fene, pero o BNG segue a pedirlle explicacións

PPdeG e BNG pronunciáronse este venres sobre a moción de censura de Fene. Os conservadores para xustificala, malia que o seu aliado, Somos Fene, presentouse como unha marea. Os nacionalistas para pedir a En Marea que desautorizase aos de Somos Fene, algo que xa fixeron hai dous días.

Rolda de prensa de Lobeira e do alcalde de Fene Juventino Trigo | Fonte: BNG Ferrolterra

Así, Bieito Lobeira, membro da Executiva Nacional do BNG, compareceu hoxe ante os medios acompañando do alcalde que probablemente perderá o cargo. Lobeira pediu explícitamente a En Marea e ao seu líder Luís Villares que tomen medidas contra os dous edís de Somos Fene, “máis alá de aspectos declarativos”.

En Marea xa publicou o mércores, en canto se confirmou a presentación da moción de censura,  emitiu un comunicado no que “rexeita categoricamente a moción de censura presentada por Somos Fene co apoio do Partido Popular no Concello de Fene e que segue a liña de tráfico político coa que o PP está operando en concellos como Sanxenxo, Tui ou o propio Fene”. A coalición non tivo reparos en aplaudir o traballo do Bloque ao sinalar que “é necesario salientar o traballo municipal que desenvolve o actual grupo de goberno formado por BNG-EU en favor das melloras sociais e da atencións ás necesidades da veciñanza, un labor dificultado permanentemente polos tres grupos de oposición nese concello”. Malia isto, hoxe o Bloque teimou que "En Marea debe ser clara para que os votos duns tránsfugas non outorguen o goberno de Fene ao PP".

Dende o PPdeG tiran do argumentario de sempre para xustificar as mocións de censura. O feito de que os seus socios sexan nesta ocasión unha das “mareas de Podemos” non lle suscitou ningún comentario ao seu voceiro. Miguel Tellado dixo hoxe que non non cre que superaran ningunha liña vermella ao formar esta coalición tan sorprendente porque “os veciños de Fene están descontentos cun goberno que non foi quen de dar estabilidade”.

Tellado lembrou que o BNG montou incialmente un goberno canda PSdeG e Somos Fene pero que “ese pacto durou moi pouco”. “Con catro concelleiros non se pode gobernar o Concello de Fene”, engadiu. En realidade son cinco, pois o Bloque sumou un edil de Esquerda Unida ao executivo local cando rachou a súa alianza inicial con nacionalistas. 

Por outra banda, o alcalde que posiblemente perderá o cargo, Juventino Trigo, dixo que detrás da moción había un intento de parar unha investigación sobre un presunto caso de corrupción que afectaría a un concelleiro do PPdeG pola desaparición dunhas farolas na lexislatura anterior, cando gobernaban os conservadores. “Destrás desta moción está o interese de tapar as corruptelas do PP investigadas pola Xustiza", declarou.

Dende a marea veciña de Somos Cabanas piden diálogo para evitar o pacto co PP. “A candidatura de Cabanas detectou diferenzas entre as candidaturas de esquerda en Fene que se poderían resolver con vontade e asentando principios de respecto e escoita activa” din antes de ofrecerse como mediadores. Aos de Somos Fene advírtenlles que “calquera das persoas que participaron nestas candidaturas non debe amparar actuacións que vaian en contra do espírito e principios que as inspiraron”.