Varios campos de mámoas en Ferrol foron arrasados por eucaliptos desde 2015 a pesar das denuncias

As agresións ás mámoas do concello de Ferrol debido ás plantacións e tallas de eucaliptos son continuadas. Desde febreiro de 2015 hai documentadas agresións que foron comunicadas a Patrimonio. E, aínda así, as agresións continuaron en abril de 2016 e marzo de 2017.

De feito, é a terceira vez en menos dun ano que monumentos megalíticos son destrozados neste concello. Primeiro era unha mámoa de Mougá, na parroquia de Doniños, en Ferrol e logo a Mámoa 1 de Espadanido, na parroquia de Esmelle, tamén no mesmo concello. E, hai uns días eran catro mámoas da necrópole megalítica coñecida como A Cheira as afectadas tal e como denuncia o portal Historia de Galicia.