A Audiencia Nacional ordena o ingreso en prisión de Tania Valera

Segundo informa fontes xurídicas, a Sala Primeira librou exhorto ao xulgado de Vilanova i la Geltrú, onde Tania Varela foi interrogada despois  da súa detención, para que se proceda ao ingreso en prisión  a española máis buscada pola Europol. Sobre ela  pesaban tres ordes de procura e captura por branqueo de capitais e tráfico de drogas.

A primeira emitiuna a Audiencia Nacional logo da súa fuga en 2013 e un ano despois o xulgado de primeira instancia e instrución número 2 de Cambados (Pontevedra) solicitou tamén unha orde de procura e detención por un presunto delito de branqueo de capitais. Posteriormente, en 2016 a Audiencia Nacional volveu emitir unha orde de detención e ingreso en prisión como presunta autora dun delito de tráfico de drogas.

A narcotrafricante, que formaba parte dos 52 fuxitivos máis buscados pola Europol, levaba máis dun ano vivindo de forma clandestina en Sitges (Barcelona). No momento da súa detención, realizada este luns por efectivos de estupefacientes, identificouse cun nome falso, polo que foi trasladada a unha comisaría de Vilanova i a Geltrú (Barcelona) onde compararon as súas impresións dixitais coa base de datos.

MULTAS MILLONARIAS

Tania Varela, de 44 anos e natural de Cambados, foi condenada en 2011 a sete anos de prisión por delito contra a saúde pública e ao pago de dúas multas de 318 millóns de euros polos seus vínculos cunha organización criminal dedicada á introdución en España por vía marítima de grandes cantidades de cocaína. Estaba relacionada ademais cos clans galegos de Laureano Oubiña e Sito Miñanco.

Desde a súa fuga no ano 2013 estivo en Portugal e Sudamérica, segundo explicou o intendente Antoni Rodríguez, responsable da División de Investigación Criminal (DIC) dos Mossos d'Esquadra, quen engadiu que se vai a investigar os motivos polos que residía en Sitges e se durante este últimos catro anos volveu a reincidir.