Rosalía, Rubén Blades e Wolfmother estarán nas festas do Apóstolo 2018

Os cantantes Rosalía e Rubén Blades, e o grupo de rock Wolfmother son algúns dos "artistas recoñecidos" que participarán nas festas do Apóstolo 2018 na capital galega, que terán lugar do 15 ao 31 de xullo.

Así, o avanzou a alcaldesa en funcións, María Rozas, quen non quixo dar máis detalles da programación e anunciou que o vindeiro martes a concelleira de Acción Cultural, Branca Novoneyra, será quen dea todos os detalles da programación destas festividades.

Iso si, a rexedora en funcións tamén explicou que as festas contarán con "presenza feminina", xa que todos os días haberá concertos de mulleres. Ademais, no Centro Cívico Romaño-Vista Alegre, actuarán artistas migrantes do ámbito musical, cultural e teatral, aclarou.

As actividades da programación destas festividades serán gratuítas, por razóns culturais e de interese público, apuntou a alcaldesa. Deste xeito, as festas terán un custo total de 657.000 euros.

LIMPEZA DE ROZAS

Así mesmo, a alcaldesa anunciou que se aprobou o proceso de adxudicación dun contrato como proposta complementaria de rozas. Con este contrato, preténdese complementar os traballos principais de rozas e así rozar, limpar e manter as marxes de estradas, os camiños fluviais e parcelas municipais, por un custo duns 121.000 euros.