Falta de auga en varios barrios da Coruña e plan de autoprotección activado no porto de Vigo

O apagamento xeneralizado afectou tamén á subministración de auga corrente en puntos altos da cidade da Coruña, como as zonas de Monte Alto, Eirís e O Castrillón, debido a que parte da auga que se distribúe na cidade e na comarca móvese mediante sistemas de bombeo afectados tamén pola avaría. Segundo informou o Concello da Coruña, os bombeos mantéñense parcialmente mediante grupos electróxenos, polo que está garantida a subministración para as infraestruturas esenciais, como os hospitais. Por conseguinte, a alcaldesa coruñesa, Inés Rey, chamou á cidadanía para reducir "ao mínimo" o consumo de auga.

O Concello herculino creou un "gabinete de crise" para afrontar as consecuencias da falta de enerxía eléctrica, que se reuniu por segunda vez a tarde deste luns. Os servizos de emerxencia municipais da Coruña rescataron a 90 persoas que quedaron encerradas en elevadores polo apagamento. Ás cinco da tarde non quedaba atrapada ningunha persoa en elevadores. Nun comunicado, o consistorio subliña as actuacións para a atención aos colectivos máis vulnerables.

PORTO DE VIGO

O Porto de Vigo activou o seu plan de autoprotección en fase verde (emerxencias) e puxo en marcha xeradores para manter a súa operativa, aínda que advertiu de que o apagamento, se mantén moito tempo, pode ter impacto nas empresas. Segundo comunicaron fontes da organización portuaria, os xeradores permitiron manter a actividade nas oficinas, así como nas áreas de seguridade e control. Con todo, o sistema de guindastres quedou inactivo.

Respecto diso, as mesmas fontes explicaron que, en principio, a situación afectou a un barco portacontedores que, polo momento, non poderá traballar. "Seguimos moi de preto a última hora e estamos moi preocupados por se se mantén no tempo, xa que podería ter graves repercusións para as empresas", sinalaron desde o Porto de Vigo.