A nai dunha moza ferida: "Non queremos diñeiro, só que se saiba quen é o responsable"

A nai dunha das mozas feridas no derrube dun peirao durante un concerto do festival O Marisquiño reclamou este venres "que isto non quede no esquecemento" e que "se faga xustiza", porque "ten que saberse quen foi o responsable". Así o esixiu, en declaracións aos medios, tras abordar ao alcalde de Vigo, Abel Caballero, á saída dunha visita no cuartel da Garda Civil da cidade olívica.

Dolores Pintos, nai dunha moza de 16 anos de idade, que "caeu no buraco" e sufriu un golpe leve na cabeza e unha escordadura nun pé, dirixiuse ao rexedor olívico cando este atendía aos medios de comunicación ás portas do cuartel.

"A miña filla pasou o peor momento da súa vida, que isto non quede no esquecemento, e a xuíza, que faga xustiza. Non queremos diñeiro, só que se saiba quen é o responsable, dá igual a cor política, pero que a xente saiba por qué partiu o cemento", proclamou esta veciña de Vigo.

Segundo relatou aos xornalistas, enterouse do accidente pola chamada doutra nai e, cando por fin puido contactar telefonicamente coa súa filla, esta "non paraba de chorar, estaba histérica", e tivo que tranquilizala "para que dixese onde estaba e poder ir recollela". Esta nai confirmou que a súa filla acudiu ao hospital ao día seguinte do sinistro porque, no momento, a moza "nin sequera se decatou de que lle doía o pé". "Irei presentar denuncia, irei coa miña filla porque llo debo, e ela pediumo. Insísteme en que hai que denunciar", afirmou.