As comisións de investigación do Marisquiño e do sistema sanitario arrincarán o xoves no Parlamento

As comisións de investigación do accidente ocorrido en agosto durante o festival O Marisquiño en Vigo e sobre as "consecuencias dos recortes e privatizacións sobre o sistema sanitario" arrincarán o vindeiro xoves, 27 de setembro, coa súa constitución formal no Parlamento de Galicia.

Tras rexistrar este luns os nomes dos futuros membros da comisión, e co paso que darán as comisións o vindeiro xoves, comezarán os traballos de investigación para ambas as comisións impulsadas pola oposición e será quenda para a elaboración dos programas de traballo.

Respecto diso, o presidente da Xunta, Alberto Núñez Feijóo, xa anunciou a súa intención de acudir á comisión que investigará, entre outras cuestións, a morte dun ancián nun Punto de Atención Continuada (PAC) na Estrada este verán cando non había médico. Será unha "magnífica oportunidade para falar de sanidade pública", asegurou en días pasados o mandatario autonómico.

COMISIÓN DE SANIDADE

Os populares achegan sete dos 12 membros: Aurelio Núñez Centeno, Marta Rodríguez Arias, Encarna Amigo, Marta Rodríguez-Vispo, José González Vázquez, Antonio Mouriño e Jesús Miguel Prado Patiño.

Por parte de En Marea figuran o portavoz parlamentario, Luís Villares, e a responsable sanitaria, Eva Solla; mentres que o PSdeG achega ao titular na materia, Julio Torrado, e ao seu portavoz parlamentario, Xoaquín Fernández Leiceaga. O BNG sitúa nesta comisión ao seu líder, Ana Pontón.

Concretamente, o título da comisión pretende determinar as "consecuencias dos recortes e privatizacións sobre o sistema sanitario galego (2009-2018), con especial incidencia en casos como a non dispensación de medicamentos necesarios a enfermos de Hepatite C ou o falecemento dun paciente sen atención na PAC da Estrada".

Foi impulsada polos tres grupos da oposición, facendo uso da prerrogativa parlamentaria que lle dá o regulamento para activar unha comisión de investigación sen apoio do grupo maioritario.

COMISIÓN DE O MARISQUIÑO

Na comisión que investigará o accidente do Marisquiño estarán, por parte do PPdeG: Teresa Egerique, Alberto Pazos, Marián García Míguez, Paula Prado, Cristina Romero, Jaime Castiñeira e Jacobo Moreira.

De En Marea estará o portavoz parlamentario, Luís Villares, e a vicevoceira segunda, Carmen Santos. Do PSdeG, conformarán este órgano o vigués Abel Losada e a pontevedresa Patricia Vilán; mentres que Luís Bará ocupará o escano do BNG.

Esta comisión foi impulsada polos grupos de En Marea e BNG e contou coa abstención do PPdeG, o que facilitou que saíse adiante. O PSdeG, pola súa banda, votou en contra de investigar o ocorrido en Vigo, respecto do que os populares entenden que se evitou esta comisión se o Concello vigués e o seu alcalde, Abel Caballero, facilitase unha comisión no Consistorio.