O persoal dos Puntos de Atención Continuada vai á folga

O persoal dos Puntos de Atención Continuada (PAC) irá á folga doce días nos meses de outubro e novembro para reclamar, entre outras cuestións, equipos completos de médico/enfermeiro en todos os centros e a existencia de "criterios obxectivos" para a dotación de persoal sobre a base da carga asistencial, dispersión, distribución, distancia ao hospital e número de mobilizacións polo 061 para garantir o dereito á asistencia.

Outro dos aspectos que reclaman é que calquera avaliación de "derivación hospitalaria" sexa eliminada das listas de obxectivos. "As derivacións non son opcionais, seguen criterios médicos", advirte o persoal, que apunta que os complementos de produtividade deben "adecuarse ao traballo no PAC".

Concretamente, segundo recolle a táboa para 2018 dos médicos dos PAC, o obxectivo dos médicos dos PAC situouse en derivar menos do 9 por cento. O peso deste ítem é do 5 por cento sobre o total da produtividade obtida, a mesma contía pola que se premia a colaboración na elaboración do calendario de gardas.

Dentro da táboa de compensacións retributivas, tamén se premia, cun 7,5 por cento, que a hora efectiva de atención a pacientes non exceda os 30 minutos desde a hora de incorporación ao posto de traballo, a colaboración en coidados paliativos, colaboración na estandarización dos maletíns de urxencias no PAC e sesións clínicas específicas de urxencias extrahospitalarias.

Elisa Ausín explicou que o "cumprimento vai parello á dotación económica", aínda que asegurou que os facultativos dos PAC "non van pasar polo aro" e non van deixar de derivar a unha persoa por que se inclúa este criterio. Iso si, reprochou que "se trate de incentivalos desta forma": "É un insulto".

Respecto diso, precisou tamén que estes indicadores xerais "só nalgunhas xerencias se aplican, nin sequera todas se atreven". Unha é a xerencia da Coruña, na que se matizou este criterio coa inclusión dun informe médico que avale a derivación a un hospital.

Os paros foron convocados por todos os sindicatos que se atopan na mesa sectorial —CIG, CC OO, UXT, Satse, CSIF, CESM e Omega— e terán lugar entre as 15 e as 8 horas (do día seguinte) do 16, 19, 23, 26 e 30 de outubro e 2, 6 e 9 de novembro; e desde as 8 até as 8 horas do día seguinte do 21 e 28 de outubro e 4 e 11 de novembro.

Galicia conta con 90 PAC e dúas zonas de especial cobertura e uns 900 profesionais neste servizo.

"PLAN DE CONTINXENCIA"

Manuel González Moreira, de CIG, subliñou que os PAC son un "dispositivo básico" que se encarga de "garantir a continuidade asistencial" 24 horas e todos os días do ano, así como tamén nos domicilios. "E por tanto, a dotación é fundamental para a calidade que se presta á cidadanía", incidiu.

Así mesmo, salientou que levan "meses, cando non anos" tratando de "conseguir un acordo" neste ámbito que garanta a asistencia e a dotación. "Pedimos criterios por carga real asistencial, non só polo número de consultas", puxo como exemplo.

Outra das cuestións que reclamaron os traballadores dos PAC é unha reevaluación dos plans funcións, porque non se modificou desde 2008, e a situación dos reforzos. Así, piden un plan de continxencias para ter previstas as coberturas de imprevistos por ausencias de persoal, así como que se teña en conta a "voluntariedade antes que a obrigatoriedade" á hora de cubrir as xornadas.

Neste sentido, denunciaron que persoal despois de "17 ou 24 horas" de garda "ten que quedar" porque falta dun facultativo, unha situación que piden resolver con outro tipo de planificación. Avisan de que se produce unha "situación de tensión" pola falta de persoal e iso "contribúe a deteriorar" a calidade asistencial.

FALECIDO NA ESTRADA

Ademais, lembraron o caso da Estrada este verán, onde faleceu un home cando non había médico no PAC, a pesar de que neste centro estaba un reforzo asignado. Precisamente, sobre a comisión de investigación no Parlamento de Galicia que indagará, entre outras cuestións, sobre o ocorrido neste PAC, Elisa Ausín —portavoz dos traballadores—, indicou que esperan que conten con este colectivo para explicar a súa situación na Cámara galega.

"Fágolle un chamamento. Demostre a verdade das súas palabras e sentir con intencións reais de actuación", apuntou Emilia Lama, de CC OO, en dirección ao presidente da Xunta, Alberto Núñez Feijóo, e ás súas palabras referidas a que "ía defender" os profesionais da sanidade nesa comisión parlamentaria. "Despois de seis meses, nin un só documento para mellorar as prestacións destes traballadores", denunciou.

Javier Martínez, de UXT, sacou a colación que entre os obxectivos se inclúa "o ítem" da derivación dos pacientes a un hospital. "Se o metes nun dos criterios de obxectivos", advertiu, estás a darlles a mensaxe ao médico de que "se fas moitas derivacións, vaiche a prexudicar" no salario.

Ademais, Martínez tamén advertiu deficiencias no pago de dietas. De feito, entre as reivindicacións do colectivo atópanse o pago das dietas dos domingos e festivos por concepto de comida e cea, así como o pago do 100% dos complementos de nocturnidade e festividade desde este momento e con carácter retroactivo desde 2010.

800 SINATURAS

Secundino Barreiro, de Omega, apuntou que as peticións dos traballadores do PAC contan con 800 sinaturas de profesionais e propuxo que, se o que faltan son facultativos ou outras especialidades, que se convoquen máis prazas MIR e que haxa "condicións retributivas e de traballo adecuadas" para este persoal.

Pilar Olmedo, do sindicato de enfermaría Satse, fixo un chamamento aos usuarios a entender a "necesidade" desta folga, á que "lles abocaron". O persoal dos PAC tamén pide que os calendarios de quendas se elaboren dando prioridade ao persoal propio dos PAC e que o voluntario cubra os ocos, que non se aumente a xornada efectiva das 1.451 horas e a dotación de equipos de protección individual a todo o persoal que traballa no PAC, aínda que sexa persoal en formación ou ocasional.

OFERTA DE DIÁLOGO

O Sergas saíu ao paso da convocatoria de folga e reiterou a súa "oferta de diálogo" aos traballadores para "continuar avanzando na mellora das condicións de traballo de persoal".

A Consellería de Sanidade subliña que se desenvolveron varias reunións nas que se mostrou "favorable" a atender as reivindicacións manifestadas polos profesionais, "como o pago da dobre dieta en domingo/festivo, modificacións na modulación dos acordos de xestión en materia de derivacións ou establecemento dunha uniformidade común en todos a PAC de Galicia".

Ademais, explica que xa realiza un "importante esforzo" na mellora das condicións de traballo, como a "implantación da carreira profesional", que implica un incremento retributivo medio dun 6 por cento para 22.000 profesionais, entre os que se atopan os profesionais de medicina de familia e profesionais de enfermaría destes centros. Respecto diso, o Sergas tamén lembra a súa "intención de ir recuperando outros incrementos retributivos" conforme ás leis de orzamentos.

O Sergas mantén tamén o compromiso de alcanzar maiores cotas de estabilidade do seu persoal e de manter a taxa de substitución do seu cadro de persoal. Así, as ofertas púlbicas de emprego dos últimos anos "centráronse" en atención primaria e, o próximo 25 de novembro celebraranse as probas para cubrir 214 prazas de médico de familia. No período 2012-2017 ofertáronse 1.358 prazas de médico de familia e enfemería, resalta o Sergas.

Segundo os datos achegados, ademais o número de médicos de familia incrementouse un 7 por cento, pasando de 2.434 no ano 2008 a 2.601 en 2017. Tamén subliña a "porcentaxe de estabilidade" neste colectivo: o 96 por cento dos profesionais de medicina de familia son estables e os pediatras, o 100%.

Doutra banda, indicou que se adoptaron decisións como o incremento das prazas MIR, de maneira que este ano se realizou a maior oferta do últimos catro anos con 404 prazas e aumentou a 105 para a de médico familia e comunitaria, sete máis que en 2017.