Persoal de Proxecto Home segue denunciando represalias desde a xerencia

As reunións da plataforma integrada por persoal de Proxecto Home con parlamentarios galegos tiveron lugar o pasado mes de outubro. Mais será no pleno deste mércores cando previsiblemente o grupo En Marea lle faga unha pregunta ao goberno galego sobre este asunto. Dita pregunta, á que se comprometera facer o portavoz de En Marea Luis Villares, foi tramitada polo procedemento de urxencia na cámara autonómica para ser incluída na batería de cuestións que se debaterán no próximo pleno este mércores día 7 de novembro.

A polémica desatouse dentro da Fundación Proxecto Home cando varios membros do seu plantel laboral mostraron a súa posición a favor de acollérense ao convenio estatal para Acción e Intervención Social. Desde a dirección-xerencia respondeuse que existía un marco que recollía todas os puntos relativos tanto a horarios, salarios e contratacións.

A situación desembocou nunha serie de xuízos, a maioría gañados polos traballadores e traballadores. Nun comunicado emitido a semana pasada, a Plataforma #As17deProxectoHome, denuncia “as represalias que sofren os traballadores, que inciden directamente sobre a atención aos usuarios que precisan axuda, e instan realizar prontas accións que permitan solucionar o problema”.

Unha das últimas actuacións desde a dirección-xerencia presidida por Ramón Gómez Crespo, foi o cesamento do director e asistente de director do centro que a Fundación ten nas Cernadas, concello do Val do Dubra. Ambas as dúas persoas, segundo fontes da Plataforma, seguen traballando para Proxecto Home, pero en diferentes postos. O antigo director de Cernadas traballa en turno de noite na sede en Santiago e a que fora asistenta á dirección segue en Cernadas “con tarefas administrativas”.