Pontón aviva pantasmas do pasado: a influencia do concurso eólico na derrota do BNG
Apunta a intereses políticos e empresariais na persecución xudicial ao ex conselleiro Fernando Blanco. Curiosamente, o bipartito perdeu a Xunta por escasos votos na provincia da Coruña tras unha agresiva campaña do PP amplamente divulgada por La Voz de Galicia.
- Quintana desvela por que o bipartito perdeu a Xunta: “Un prócer coruñés quería cambiar o concurso eólico”
- Boicoz, unha campaña contra La Voz
- Anular o concurso do bipartito custou, polo de agora, 1,3 millóns
Por Xurxo Salgado | Compostela | 14/11/2018 | Actualizada ás 21:32
Era un segredo a voces... Ou non tanto, porque non son poucos ex dirixentes políticos do BNG –en activo ou retirados– que teñen suliñado en público e en privado que o goberno do bipartito perdeuse por unha “campaña política e mediatica” en contra do BNG vinculada a intereses empresariais dun concurso eólico que ía mover centos de millóns de euros.
Esa campaña levou por diante figuras emerxentes do entón nacionalismo galego como o ex conselleiro de Industria, Fernando Blanco, ou ao ex vicepresidente e entón líder do BNG, Anxo Quintana. O primeiro tivo que dimitir porque o seu nome apareceu nun sumario xudicial que se acaba de arquivar case nove anos despois. O segundo acabou marchando logo das presións internas da súa propia formación.
E a este triste episodio fixo alusión este mércores a nova líder do Bloque, Ana Pontón, ao referirse ao seu ex compañeiro Fernando Blanco. “Tarde, pero a verdade saíu á luz”, salientou e preguntouse como é posible que unha persoa poida ser investigada durante oito anos “sen ningún tipo de base, nun proceso no que os prazos se dilatan condicionando a vida persoal, política e profesional dunha persoa sen que pase nada”.
“Á marxe da tardanza, é un motivo de satisfacción que se confirme o que no BNG sabiamos: Que Fernando Blanco foi unha persoa que na súa vida política defendeu os intereses de Galiza, poñendo en cuestións moitos intereses económicos dos de sempre, e pode ir coa cabeza moi alta porque sempre estivo á altura e ten acreditado o seu compromiso con este país”, recalcou a líder nacionalista.
E aínda foi mais lonxe: “Houbo intereses políticos na súa persecución... Foi por evitar que o concurso eólico o levaran catro empresas”, engadiu. E foron, precisamente, estas palabras as que volven poñer enriba da mesa esa campaña que entón se orquestrou en contra do BNG.
NACE "BOICOZ"
Unha circunstancia que entón activou á militancia do BNG a través da rede coa famosa “Boicoz”, unha campaña en contra de La Voz de Galicia. “Quem vos escreve é capaz de esquecer muitas cousas, mas dificilmente pode obviar a manipulação informativa e o acoso e derrubamento contra as Conselharias chefiadas polo BNG, em particular desde que Indústria (chefiada polo BNG) não deu ao Grupo Voz o naco que queriam da torta eólica. E tampouco posso esquecer com facilidade o claro alinhamento de La Voz com os grupos tangallegos, chegando mesmo a difundir informações falsas...Pois bem, eu, na medida do possível, procurarei em adiante não ligar nada de La Voz, nem tampouco dar-lhe publicidade através de redes sociais”, apuntaba o impulsor desta iniciativa a través do agregador de noticias Chuza. Unha campaña que calou moi forte entre a militancia do BNG, indignada polo trato que os poderes económicos e mediaticos estaban dando a esta formación.
Nesa campaña, o PP utilizou todo tipo de ataques políticos como o gasto en coches de luxo, os bailes de Anxo Quintana con vellos ou a presenza dun minibar de luxo no seu coche que logo resultou ser unha neveira portátil. Todas estas denuncias foron magnificadas entón por determinados medios, principalmente, La Voz de Galicia, quen tamén publicou en plena campaña electoral unha foto do entón ex vicepresidente co empresario Jacinto Rey.
O propio Anxo Quintana desvelaba en 2016 o que realmente pasara durante eses anos, sen pelos na lingua, e falaba abertamente dunha campaña do “prócer herculino”, en alusión a Santiago Rey, editor de La Voz de Galicia, por ser o responsable desta caza de bruxas por negarse o BNG a modificar o concurso eólico do bipartito. Algo que faría, despois, o Partido Popular a través da coñecida como “lei de depredación de Galicia”, que favorece a aprobación pola porta de atrás de numerosos proxetos eólicos vinculadas ás grandes empresas enerxéticas, tras a anulación do concurso do bipartito.
Quintana respondía directamente ao ex delegado de La Voz en Ourense que o atacara duramente nun artigo. “Contigo empezó el desastre que ahora parece haber tocado fondo. Y cuando unos aguerridos militantes, con Ana Pontón al frente, se aprestan a sacarlo a flote, eres el primero en abandonar el barco”, apunta o xornal coruñes tras anunciar Anxo Quintana a súa retirada da política activa.
A resposta do ex vicepresidente foi contundente a través dunha misiva:
“Naquel ano fun chamado a contas para comparecer ante determinado prócer herculino. Pedíronme explicacións sobre a nosa intención de utilizar, legal e democraticamente, o concurso eólico promovido polo bipartito para fortalecer o tecido empresarial galego e crear traballo e riqueza en Galicia. Pedíuseme unha rectificación. Quíxoseme facer ver “que las cosas no se hacen así”. Afirmouse diante de min, como se eu non estivera diante que”un enfermero de Allariz no puede venir a cambiar el marco económico de Galicia”. Avisóuseme de que me ativera as consecuencias. A miña resposta foi NON e a miña réplica unha recomendación: o que queira mandar en Galicia que se presente as eleccións. Nunca outra fixera! Xusto despois desa reunión un diario coruñés de dereitas comezou unha auténtica cacería contra min e contra o meu partido daquela. Paxinas enteiras con xente maior a que supostamente se lle deixaba morrer sen axudas, Galescolas onde os nenos de un ano antes de aprender a falar se lles ensinaba a cantar o himno galego,oposicións amañadas aínda que nunca se celebraran. O que fixera falla. Sen reparar en gastos nin razóns. E así ata a campaña electoral do 2009, que pasou á historia como a campaña mais porca de todas as que se coñeceron ata entón e que marcou tendencia para as posteriores. E todo para que? Para conseguir que afoutados militantes e votantes de esquerda e nacionalistas se desmobilizaran, creran as mentiras dos alleos antes que os argumentos dos propios e conseguir así eliminar pola vía das urnas o que non conseguirán coas ameazas de despacho. E conseguírono. Triunfaron”.
