Queren o 12 de xaneiro como Día da Morte Digna en Galicia, en honra a Ramón Sampedro

A Federación Galega de Municipios e Provincias (Fegamp) mostrou o seu apoio á declaración do día 12 de xaneiro como 'Día da Morte Digna en Galicia' en honra a Ramón Sampedro, o veciño de Porto do Son (A Coruña) que viviu prostrado nunha cama desde os 25 anos debido a unha tetraplexía e que se converteu nunha icona da loita pola eutanasia.

Este apoio é un dos puntos que contén unha declaración institucional remitida este mércores pola Fegamp tras ser acordada coa asociación Dereito a Morrer Dignamente DMD-Galicia.

Así mesmo, o no texto, a Fegamp traslada a súa disposición a impulsar e potenciar accións e procedementos que faciliten á poboación, especialmente no mundo rural, o outorgamento do documento de instrucións previas.

Tamén se compromete a promover a realización de campañas informativas nos centros sanitarios e servizos sociais dos concellos galegos para difundir a Lei galega de dereitos e garantías da dignidade das persoas enfermas terminais.

A Fegamp explicou que acordou este texto logo de varias reunións mantidas con esta asociación, encontros que o ente municipalista explicou que continuará mantendo co obxectivo de asinar un convenio no que se plasmen os compromisos de todas as partes neste ámbito.