O Concello de Santiago, condenado a pagar 620.000 euros á empresa Doal pola adxudicación da ORA en 2012

O Xulgado Contencioso Administrativo número 2 de Santiago de Compostela condenou o Concello da localidade a indemnizar á empresa Doal, filial de Vendex, con 620.000 euros, pola incorrecta adxudicación do contrato para a xestión da ORA e do guindastre no ano 2012.

O Concello, no que na actual lexislatura goberna Compostela Aberta, avanzou que recorrerá o fallo ao entender que Doal puido asumir a xestión do servizo no procedemento de contratación aberto en 2017 e que retomaba o de 2012 erroneamente adxudicado, pero que "non quixo".

En abril de 2018 o Xulgado recoñeceu "a imposibilidade material de executar a sentenza ditada en maio de 2017 en canto á adxudicación do contrato a favor de Doal".

O concello abrira un procedemento de adxudicación para dar cumprimento ao fallo, pero a propia empresa rexeitou asumir o contrato, tal e como propuxo a mesa de contratación correspondente. En base a esta negativa, o Concello recorrerá a sentenza, mantendo que Doal non deberá ser indemnizada.

A reapertura do proceso de contratación en 2017 provocou, ata a súa resolución, a paralización do proceso de remunicipalización do servizo.

A sentenza coñecida este mércores impón o pago a Doal de 620.000 euros, dos que 576.000 corresponden ao "lucro cesante", isto é, o 6% do importe do contrato que no ano 2012 lle foi adxudicado de forma irregular á empresa Setex Aparqui.

A adxudicación produciuse a esta empresa, en 2012, con goberno local do PP, aínda que non cumpría o prego de condicións do concurso, que sería anulado por sentenza xudicial en setembro de 2015.

OUTRAS SENTENZAS

O Concello de Santiago incidiu en que esta sentenza se suma a ouros fallos con "custos millonarios" que o Concello de Santiago recibiu nos últimos anos.

Entre eles, fai referencia á sentenza do Tribunal Superior de Xustiza de Galicia, que obrigou a pagar 1,5 millóns de euros á empresa adxudicataria da construción do parque comarcal de bombeiros de Salgueiriños polo incumprimento dun acordo do ano 2008.

Tamén pon o acento en sentenzas derivadas dos "erros na liquidación do transporte urbano" do período 2007-2011, que custaron máis de 600.000 euros, ou a devolución de máis de 400.000 euros polos custos de urbanización do SUP-121 do Castiñeiriño, paralizado en 2011.

Ademais, o Concello solicitou a paralización do procedemento xudicial aberto pola reclamación de ADIF para que a administración local abónelle dez millóns de euros pola construción do viaduto de Cornes, "polo incumprimento do convenio asinado en 1998".