En Marea esixe información sobre o novo campionato de caza de raposo deste domingo
O grupo parlamentario reclámalle a Medio Ambiente que cumpra coa obriga de indicar a localización exacta do evento e critican que a Xunta apoie e financie este tipo de competicións.
- Os animalistas protestan na rúa contra o apoio da Xunta aos campionatos de caza
- "Putones", "escoria" e "piojosos" aos que "pegar un tiro", a violencia dos procaza do raposo contra os animalistas
Por E.P. | SANTIAGO DE COMPOSTELA | 17/01/2019 | Actualizada ás 11:41
En Marea remitiu unha carta á Consellería de Medio Ambiente na que esixe información sobre o campionato de caza de raposo que se prevé celebrar este domingo, 20 de xaneiro. Segundo critican, "a día de hoxe descoñécese a localización exacta da celebración do mesmo".
O deputado de En Marea Pancho Casal censura que este evento conte coa autorización de Medio Ambiente, dentro dos plans dos tecores nos que se vai a celebrar, "así como co apoio e financiamento da Xunta".
Deste xeito, o grupo parlamentario advirte á conselleira de Medio Ambiente, Ángeles Vázquez, de que en caso de non ser informados exercerán as accións oportunas para denunciar os seus incumprimentos e a ocultación de información.
"Dentro das obrigas de transparencia que corresponden ao seu labor -sobre todo tendo en conta que é unha actividade que conta coa autorización, colaboración e patrocinio da Xunta de Galicia- deberá facilitar a información relativa ao lugar de celebración, ademais daquelas requiridas legalmente para a celebración do mesmo", remarca Casal.
Ademais, En Marea mostra a súa oposición a este tipo de eventos, xa que están "carentes de ningunha xustificación ambiental e de xestión das especies".
