Galego versus castelán, o novo campo de batalla entre Vox e o PP

A nova guerra do PP e de Vox está na lingua e pode poñer en perigo a visión “galeguista” que aínda mantén certa parte do Partido Popular. O cambio de estratexia dos populares viuse esta fin de semana durante a súa Convención Nacional na que o seu líder, Pablo Casado, dixo que o seu partido tiña que ser o referente do castelán no conxunto do Estado.

Manifestación de Galicia Bilingüe na que participaron dirixentes do PP e de UPyD | Fonte: elconfidencialautonomico.com

Este discurso non é novo dentro do Partido Popular pero certas seccións autonómicas deste partido tiñan “relaxado” ou, mesmo, aparcado, o de facer política a conta da lingua.

E por que volven os populares a rescatar o conflito lingüístico?... A irrupción de Vox no panorama político español fixo que o novo líder do PP utilice a defensa do castelán para recuperar votantes que perde pola dereita. Unha estratexia que comparte a vella garda dos populares, con José María Aznar á cabeza.

Esta fin de semana o secretario xeral de Vox, Javier Ortega Smith, reivindicaba a suposta necesidade de que "se protexa o dereito a coñecer e falar o español" en Galicia e criticaba as primeiras leis de normalización lingüística "promovidas por Fraga". Non é a primeira vez que o partido de ultradereita utiliza a lingua para facer política. Cataluña, Valencia, Mallorca, Euskadi, Navarra e mesmo Asturias converteronse en campos de batalla lingüísticos para esta formación.

"FALAR ESPAÑOL"

Nas súas críticas ao PP, Ortega referíase en Ourense á política lingüística da Xunta. Mostrouse desconforme coas primeiras leis de normalización lingüística "promovidas por Fraga" e lamentou que, "desgraciadamente", este modelo se seguira noutros lugares como Cataluña, Baleares ou Valencia. “Agora os populares de Valencia queren tamén seguir o modelo de Fraga”, recriminaba.

García Egea, do PP, e Ortega Smith, de Vox, asinan un pacto para a gobernabilidade en Andalucía | Fonte: telesur

"Queremos que se protexa o dereito constitucional a poder coñecer e falar o español nas administracións e que os medios públicos se emitan español; iso non significa deostar o galego, pero o galego, parte da riqueza cultural lingüística española, e ten que ter un encaixe dentro da educación do mesmo xeito que o español", defendeu, ignorando a verdadeira realidade lingüística que amosan as estatísticas.

Este luns, e logo de que o propio Casado se atribuira na súa convención a defensa do castelán no conxunto do Estado, Ortega Smith volvía a atacar ao PP e acusaba ao líder popular de copiarlle os discursos e "até os eslóganes".

FEIJÓO E O PLURILINGÜISMO

Non é a primeira vez que se utiliza o enfrontamento lingüístico para conseguir votos. Fíxoo o PP durante o goberno do bipartito participando en manifestacións de asociacións como Galicia Bilingüe, liderada por Gloria Lago, hoxe impulsora tamén doutra a nivel estatal, “Hablamos español”. Un debate que tamén airearon algúns medios de comunicación hoxe moi subvencionados por parte da Xunta do PP.

A guerra lingüística en Galicia provocou que Feijóo se comprometera a facer un decreto, o do plurilingüismo, que rachou co cosenso que había desde a época de Fraga. Con este novo decreto tentaba disfrazar a súa errática política en materia de lingua apostando por unha educación en galego, castelán e español a partes iguais. Un decreto que, co tempo, viuse que non acaba de funcionar pola forte preeminencia do español na docencia, tal e como reflicten os informes do Consello da Cultura Galega e da RAG.

A nova chamada de Casado a facer do castelán un baluarte político non convence a algúns dirixentes do Partido Popular en Galicia, nomeadamente, a aqueles que veñen de familias galeguistas, nomeadamente do que no seu día foi Centristas de Galicia. "Esa política o que vai facer e distanciarnos dos nosos votantes. Non se pode utilizar o caso catalán e aplicalo en Galicia. Aquí o galego segue sendo a lingua da aldea", apuntan.

Pablo Casado durante unha rolda de prensa