O PP de Lugo sobre as tensións internas "Haberá xente á que lle guste máis ou menos as decisións"

A presidenta do PP de Lugo e alcaldesa de Mondoñedo, Elena Candia, confirmou este luns que o seu partido presentará candidaturas nos 67 concellos da provincia lucense, á vez que quitou ferro ás tensións internas xurdidas nos últimos días relacionadas coa confección das listas electorais.

Así, despois da saída da presidencia do PP de Monforte a Julia Rodríguez e da dimisión do portavoz en Viveiro, Antonio Bouza; Candia destacou que o pasado luns "se pechaba co comité de dirección ao candidato á alcaldía de Vilalba, que será Agustín Baamonde, ou que se pechou hoxe (por este martes) a candidata de Negueira de Muñiz".

A presidenta dos populares lucenses resalta que o partido está "a traballar nos 67 concellos, e indubidablemente nalgún deles poderá haber algún tipo de xente que lle guste máis ou menos as decisións que se van tomando".

"Fago un balance político, somos o grupo político con máis candidatos feitos públicos", reivindicou Candia, quen afirma que a organización das agrupacións locais vai "a moi bo ritmo" e que as candidaturas están definidas xa "na maioría dos concellos".

Así, afirmou que "faltan moi poucos concellos" e que "o obxectivo é preparar os equipos da mellor maneira posible, cos mellores programas posibles e tentar conseguir as alcaldías". 
Neste sentido, lembrou que nas eleccións de 2015, "nalgunhas agrupacións os resultados (do PP) foron francamente malos", polo que aposta por "reorganizarse para mellorar resultados". "Ningún cambio busca outro obxectivo que non sexa ese (mellorar resultados)", concluíu.

Elena Candia, presidenta da Deptuación de Lugo | Fonte: ppdelugo