O diésel, á cabeza nas vendas de coches de ocasión en Galicia
Máis da metade foron vehículos con máis de 10 anos de antigüidade. Pontevedra é a provincia que rexistrou un prezo medio máis alto, con 15.187 euros.
Por E.P. | SANTIAGO DE COMPOSTELA | 14/02/2019 | Actualizada ás 12:35
O prezo medio do coche de ocasión situouse en Galicia nos 14.442 euros durante o primeiro mes do ano, segundo os datos recollidos pola páxina coches.net. Deste xeito, este dato estaría levemente por encima da media nacional, que alcanzou os 14.242 euros. Os máis vendidos foron os modelos diésel, que supoñen o 72,9% das transaccións totais.
Segundo os datos facilitados polo Instituto de Estudos de Automoción, en xaneiro vendéronse en Galicia un total de 11.293 coches, da cifra total de 204.126 a nivel do Estado -un crecemento do 6% no conxunto de España-.
Case tres cuartas partes do total correspóndense con modelos diésel e cunha antigüidade superior aos 10 anos, o 57,9% do total. As vendas dos modelos de gasolina representan o 26,1%. O 1,7% restante correspondeu a vehículos de ocasión eléctricos e híbridos.
Entre as provincias galegas, Pontevedra foi a que alcanzou a cifra de prezo medio de vehículo de ocasión máis elevado, con 15.187 euros, seguida de Ourense con 15.267. Pola contra, aquelas que reflicten un prezo máis alcanzable son A Coruña (13.165) e Lugo (13.295).
Os coches máis vendidos en Galicia en xaneiro foron o Volkswagen Golf, o Renault Mégane, o Seat León, o Seat Ibiza e o Ford Focus, os mesmos modelos que o mes anterior.
OFERTA
Máis da metade dos coches á venda a través deste portal teñen menos de 5 anos de antigüidade -o 50,2%-. De feito, os inferiores a 3 anos supoñen o 31,7% do total de oferta.
En canto á oferta, os coches con máis de 6 anos representan o 49,8% en Galicia, sendo os de máis de 10 anos os máis representativos desta franxa (27,8%). Con todo, nun período máis curto, os coches entre 1 e 3 anos supoñen a maioría dos que están á venda en Galicia, o 31.1%.
Con respecto á quilometraxe, destaca que os vehículos con menos de 20.000 quilómetros representan o 20,2% do total da oferta, que segue decantándose, no entanto, maioritariamente por coches con máis de 80.000 kms. -o 58,5%-, mentres que os de menos de 80.000 supoñen o 41,5% da oferta.
