Condenado un garda civil por inxurias contra a xuíza Pilar de Lara
Tamén se condenou a un ex membro da Garda Civil polos mesmos cargos contra a xuíza que investigou a operación Carioca e a que instruiu o caso.
Por Europa Press / Redacción | SANTIAGO DE COMPOSTELA | 27/02/2019 | Actualizada ás 20:36
O Xulgado do Penal número 1 de Lugo condenou a un garda civil e a un ex-axente deste corpo por inxurias contra a xuíza encargada da investigación da operación Carioca, Pilar de Lara, e a maxistrada que instruíu o caso Campión, Estela San José.
Segundo informou este mércores o Tribunal Superior de Xustiza de Galicia (TSXG), ambos foron condenados por intervir en foros de Internet a través dunha páxina administrada pola Asociación Unificada de Gardas Civís e realizar "comentarios con ánimo de desprestixiar a actuación profesional" de ambas as maxistradas.
En concreto, segundo o fallo, un dos acusados foi condenado a indemnizar a unha das afectadas con 3.000 euros e, á outra xuíza, con 1.500. Ademais, tamén se lle condena por un delito de coaccións leves.
A titular do Xulgado do Penal sentenciou ao outro home ao abono dunha multa de 2.400 euros por cometer un delito de inxurias á autoridade xudicial. O imputado terá que pagar á prexudicada 1.500 euros. A sentenza, da que informou este mércores o TSXG, indica que a Asociación Unificada de Gardas Civís responderá solidariamente das indemnizacións.
Ambas as maxistradas compareceron o pasado mes de xaneiro como testemuñas no xuízo no que o Ministerio público pedía para os acusados unha multa económica polos delitos de "inxurias e calumnias". Pola súa banda, a representación de De Lara reclamaba elevar a pena a dous anos de cárcere por "coaccións" contra o axente en activo.
