Oito de cada dez comunicadoras galegas secundaron a folga do 8M

Oito de cada dez traballadoras dos medios e os gabinetes de comunicación de toda Galicia secundaron a folga de mulleres do 8 de marzo, segundo os datos obtidos por Xornalistas Galegas, un colectivo de máis de 200 mulleres profesionais das Ciencias da Comunicación que desenvolven a súa actividade en Galicia en defensa dun xornalismo con perspectiva feminista.

Xornalistas, fotógrafas, infografistas ou deseñadoras dos medios e gabinetes de comunicación das catro provincias galegas uníronse de xeito masivo á folga feminista convocada a nivel mundial, superando o 50% de secundamento en todas as grandes cidades de Galicia, como Santiago de Compostela (93%), Pontevedra (93%), Vigo (92%), A Coruña (60%), Lugo (60%), Ferrol (60%) ou Ourense (52%).

No caso dos medios de comunicación e gabinetes autonómicos (traballadoras das delegacións galegas de xornais ou televisións estatais, así como comunicadoras de oenegués, fundacións, institucións públicas e privadas ou colexios profesionais), a porcentaxe de mulleres que secundaron a folga do 8 de marzo ascendeu ao 78%.

Os datos de seguimento da folga de mulleres do 8 de marzo exclúen as comunicadoras que non tiñan quenda de traballo ese día, así como as traballadoras de baixa laboral, en excedencia ou en desenvolvemento de prácticas profesionais. A asociación Xornalistas Galegas tampouco tivo en conta os paros parciais nin as medias xornadas realizados polas comunicadoras galegas o 8 de marzo.

Dende Xornalistas Galegas celebran o wcontundente apoio" á folga de mulleres do 8 de marzo por parte das comunicadoras galegas, un feito que "evidencia a necesidade urxente duns medios de comunicación igualitarios con perspectiva de xénero, sen teitos de cristal nin diferenzas nas condicións laborais e salariais por cuestións de xénero", din.