A castaña, motor da economía e do rural galego

O conselleiro de Medio Rural, José González, participou este luns en Boqueixón (A Coruña) na constitución da Mesa da Castaña, un órgano colexiado de carácter consultivo e asesor no que, ademais da Xunta, están representados os principais axentes sociais e económicos co obxectivo de "consolidar" o liderado de Galicia na produción deste froito.

 

E é que, segundo informa o Goberno galego, a galega é "a principal" autonomía de España en produción e exportación de castañas, con ao redor de 20 millóns de quilos anuais. Este volume, unha vez transformado, xera un valor superior aos 70 millóns de euros en comercialización. Neste contexto, o conselleiro do Medio Rural erixiu este froito como "transcendente, importante e paradigmático" para a Comunidade, xa que conta cunha superficie de plantación de castiñeiros que chegan a ocupar case 46.500 hectáreas.

 

Así, González insistiu no traballo conxunto da administración e o sector "para que a castaña, que xa é importante na actividade económica do rural galego, creza aínda máis". A Mesa terá como principais obxectivos funcionar como un foro continuado de diálogo e traballo, así como impulsar medidas de fomento, promoción, mellora, vertebración e coñecemento destas producións.

 

Ademais, o conselleiro recalcou que este órgano suporá tamén "un impulso" á defensa dos castiñeiros en Galicia, "unha alternativa económica no agro que favorecerá a creación de riqueza e emprego no rural".