O festival Atlántica Gastronómica, o evento que quere ser referencia da gastronomía galega na Coruña
Dende a organización afirman que buscan conseguir "un macroevento diferente".
Por E.P. | A CORUÑA | 02/05/2019 | Actualizada ás 14:05
A Coruña acollerá entre o 31 de maio e o 3 de xuño o festival Atlántica Gastronómica, un evento que nace para ser o "amplificador" das festas gastronómicas galegas e converterse na cita de referencia da gastronomía galega.
En rolda de prensa, os organizadores de Atlántica Gastronómica, Roi Correa e Antón Correa, presentaron esta cita que naceu para ser un "macroevento diferente" dedicada á gastronomía galega. E farao, na contorna da Mariña e o Parrote, cunha oferta que conta con expositores, casetas de cociña atlántica con representación de todas as provincias de Galicia, degustacións, premios, espazo para establecer networking a través do Business Center, premios, relatorios e talleres, entre outros.
A cita conta cun formato único dividido en dúas seccións: unha dirixida a todos o públicos -Festival- e outra exclusiva para expertos e empresas de sectores como a gastronomía, enoloxía, alimentación, hostalaría, turismo ou comercio -Profesional-. "Temos a necesidade de lanzar o que temos: o produto, o saber facer...", dixo Antón, que destaca a intención deste evento de "pór en valor" a gastronomía e os produtos galegos. "Temos de que presumir", engade.
MÁIS DE 20 POSTOS
Segundo adiantou, o evento versará sobre catro temáticas: a dieta atlántica, a sustentabilidade, o turismo gastronómico e, por último, a innovación e o emprendimiento. A pesar de ser un evento "puramente gastronómico", con máis de 20 postos de restauración de diferentes locais galegos, no seu programa destacan outro tipo de actividades, entre as que destacan os concertos de grupos como Igloo ou Escuchando Elefantes, entre outros.
Ademais, na parte profesional, destaca a celebración dun campionato de coctelería ou a celebración do primeiro campionato de grella de peixe e de carne. Aínda que está dirixido a profesionais, celebrarase no exterior de Palexco para que o público poida gozar desta cita coa grella.
