Concentración diante do Hospital do Salnés para reivindicar "un mínimo de 10 celadores máis"
Desde o Colectivo d@s Celadores do Salnés destacan o apoio de compañeiros doutras categorías profesionais do Hospital do Salnés á convocatoria dos celadores, que tamén contou co apoio da xunta de persoal.
Por Europa Press / Redacción | SANTIAGO DE COMPOSTELA | 21/05/2019 | Actualizada ás 12:55
Medio centenar de persoas concentrouse este martes pola mañá no Hospital do Salnés convocadas polo colectivo de celadores para reivindicar "un mínimo de dez" traballadores desta categoría no centro.
Así o manifestou Celso Xavier Milleiro Sánchez, representante do Colectivo d@s Celadores do Salnés, quen destacou o apoio de compañeiros doutras categorías profesionais do Hospital do Salnés á convocatoria dos celadores, que tamén contou co apoio da xunta de persoal.
Cunha pancarta na que se podían ler 'Celadores en loita. Non á dismicriminación', concentráronse a partir das 11,30 horas deste martes na entrada do Hospital do Salnés con máscaras brancas na cara.
Respecto diso, criticaron que a dirección do hospital pedise un incremento de persoal doutras categorías e non para a de celadores. "Falta persoal de celadores e moito", sostiveron os concentrados.
Milleiro comentou que no Hospital do Salnés hai 27 celadores entre fixos e interinos e estiman que necesitan "dez ou doce máis". Deste xeito, explicou que mentres "en Pontevedra hai un único celador" por planta, eles levan "dúas plantas". Por iso, reivindican que sexa proporcional "segundo número de camas e servizos".
Para o mes de xuño prevén convocar outra concentración á que convidarán a compañeiros doutras categorías profesionais, neste caso previsiblemente a de técnicos de enfermaría, ademais da os "ambulancieros" nunha mobilización posterior.
