Bugallo falará co resto de grupos pero podería gobernar en solitario

O socialista Xosé Sánchez Bugallo, que este domingo conseguiu ser a lista máis votada en Santiago de Compostela, admitiu que na súa formación están "felices e satisfeitos" cun "resultado que cobren todas as expectativas e aspiracións" e que lles dá estabilidade como para tentar gobernar en solitario.

"Queriamos un resultado claro e claramente fomos a lista máis votada", feito que, dixo, dá ao PSOE un "respaldo suficiente para asegurar a gobernabilidade" da cidade, tal e como comentou Bugallo na súa primeira rolda de prensa tras as eleccións municipais. Con todo, o que foi rexedor na cidade entre 1998 e 2011, apuntou que a decisión respecto diso non está "totalmente tomada" polo que en próximas datas falará co resto de portavoces.

En primeiro lugar, quere manter unha conversación co líder de Compostela Aberta e até agora alcalde compostelán, Martiño Noriega, para establecer un "traspaso de poderes na máis absoluta normalidade". Así mesmo, avanzou, establecerá contactos coa portavoz do BNG en Santiago, Goretti Sanmartín e co que será líder da oposición, o popular Agustín Hernández, con quen Bugallo aventurou "moitos espazos de coincidencia".

Todo iso, sinalou Bugallo, obedece á súa intención de ser desde o próximo 15 de xuño "o alcalde de todos os composteláns" e non só dos socialistas. "Non hai ningún outro plan, o 15 de xuño vou ser o alcalde de todo Santiago, non do PSOE. O meu partido é a miña cidade por encima de todo", proclamou.

Tamén o 15 de xuño, tras ser investido como rexedor da cidade, como espera, Bugallo prometeu "seguir a tradición" e chamar en primeiro lugar ao presidente da Xunta, Alberto Núñez Feijóo, ao reitor da USC, Antonio López, e ao arcebispo de Santiago, Julián Barrio. Xa logo porase en contacto cos ministros, o presidente do Goberno e tamén co Rei ante a inminente convocatoria do Real Padroado.

COLABORACIÓN COA XUNTA

Con esta rolda de contactos no horizonte, Bugallo presentouse como un "leal colaborador institucional" para a Xunta polo que lle dixo a Núñez Feijóo que espera que esa sexa unha actitude recíproca en tanto que el non busca ser "un rival político" do presidente galego "pero tampouco un subordinado". "Coa Xunta queremos lealdade e respecto mutuo", aseverou.

E, entre os principais retos que se marca o socialista, están o mellorar nas infraestruturas da cidade, preparar o Xacobeo 2021 e facer da cidade un lugar con máis oportunidades laborais porque aínda que "non teñamos un Citroën ou un Inditex", o municipio ten moitas posibilidades, sostivo.

Finalmente, Bugallo tamén se referiu a varios aspectos do mandato de Noriega que prevé impugnar xa que solicitará a "paralización" da licitación de orzamentos participativos que se aprobou na última xunta de goberno local ou a paralización do viario de Clara Campoamor.

Tampouco se expoñen no PSOE "ningún proceso de fusión" aínda que buscarán unha área metropolitana forte con socios tamén socialistas en Ames, Brión, Oroso e Negreira. Con estas premisas, Bugallo busca ser un alcalde que recupere para Santiago unha "posición central e referencial" e capaz de "deseñar o novo Santiago" porque aínda que el fose alcalde fai oito anos "non somos nostálxicos do pasado".

GORETTI SANMARTÍN

Goretti Sanmartín remarca que rompe con 20 anos de caída do Bloque en Compostela, pero admite que non se cumpren as expectativas. A portavoz do BNG en Santiago,cre que é "moi pronto" para falar da posibilidade de entrar no goberno municipal tras a vitoria de Xosé Sánchez Bugallo (PSdeG), aínda que subliña que, "como todo o mundo sabe botar contas", a suma de PSOE (10 edís) e BNG (dous concelleiros) non alcanza para a maioría absoluta, que está en 13 actas.

 

En rolda de prensa, Sanmartín apuntou que agora deberá reunirse a asemblea local para avaliar os resultados electorais, mentres aclara que aínda non hai unha posición decidida na formación de face á investidura de Sánchez Bugallo.

A este respecto, sostén que "hai moitas opcións" nun "escenario moi aberto" tras os resultados electorais, mentres "lle corresponde" a Sánchez Bugallo impulsar contactos.

Así mesmo, a nacionalista destacou a "ruptura da tendencia á baixa" do BNG nos últimos 20 anos na capital de Galicia, xa que perdera votos desde 1999 --chegou a ter cinco edís no Consistorio--, ao conseguir 1.541 votos máis ata un total de 4.870 (unha subida de case o 32%).

Con todo, admitiu que non se cumpren as expectativas previstas, dado que os resultados "non acaban de satisfacer". Así, explica que se quedaron a pouco máis de 500 votos do terceiro concelleiro, para o que necesitasen subir un punto porcentual desde o 9,31% conseguido ata un 10,41%.