O Estatuto do Consumidor Electrointensivo aprobarase en canto se forme o Goberno, segundo Maroto
Por E.P. | MADRID | 26/06/2019 | Actualizada ás 10:28
A ministra de Industria, Comercio e Turismo en funcións, Reyes Maroto, afirmou este mércores que o Goberno levará ao Consello de Ministros o Real Decreto sobre o Estatuto do Consumidor Electrointensivo en canto o novo Executivo se configure.
Maroto, en declaracións á cadea SER recollidas por Europa Press, explicou que o Goberno tiña previsto aprobar esta norma fai aproxidamente un mes, pero "impediuno" o informe desfavorable que emitiu a Comisión Nacional dos Mercados e a Competencia (CNMC) sobre o proxecto de Real Decreto.
Este aprobouse o pasado mes de decembro coa idea de garantir un marco de estabilidade para que a empresa coñeza cal vai ser no futuro o seu custo enerxético, explicou. O pasado mes de abril, a CNMC publicou un informe no que, entre outras consideracións, estimaba inadecuado limitar a condición de consumidor electrointensivo ao nivel de tensión e á estrutura da tarifa de acceso á que está acollido.
Agora, Maroto, á que non lle importaría repetir en Industria no novo Goberno, asegurou que se está terminando de elaborar a norma e que hai intención de aprobala en canto se poida. "Estamos en condicións de poder levalo ao Consello de Ministros en canto se configure o Goberno", subliñou a ministra, que insistiu en que este Estatuto é "o marco de estabilidade que necesita a industria".
