Denuncian que o cargo da Xunta investigado usou informes "plaxiados" para defender á mineira de San Finx

Unha vintena de colectivos agrupados na rede Contraminacción denunciaron que o director xeral de Minas, Ángel Bernardo Tahoces, --investigado por un suposto delito de prevaricación ambiental en relación coa reapertura da mina de San Finx, en Lousame-- usou informes dun profesor da USC que foron "plaxiados" co fin de defender o proxecto.

Nun comunicado, sinala que un dos informes, asinado polo profesor xubilado Felipe Macías Vázquez e outros colaboradores, contén "plaxios de traballos doutros autores, manipulacións e mesmo parágrafos enteiros copiados sen citación de blogues de Internet".

En 2017, a concesionaria do Grupo Sacyr que explota a mina de San Finx, decidiu recorrer a Macías para "tentar dar resposta" ás alegacións que xurdiron ao "verter millóns de metros cúbicos de augas contaminadas por metais pesados no río San Finx".

Ao parecer de Contraminacción, esas argumentacións deixaron en evidencia a "burla" que supuña o método de "tratamento" proposto e como as verteduras provocarían un empeoramento da situación de contaminación.

Por iso, acusa á concesionaria mineira e á Dirección Xeral de Enerxía e Minas de valerse destes informes para "omitir a responsabilidade" da empresa en relación aos "impactos ambientais causados pola mina e a administración".

ARGUMENTOS EN FAVOR DE "INTERESES PRIVADOS"

Os argumentos expostos por Felipe Macías Vázquez non só "favorecen aos intereses privados do Grupo Sacyr", senón que tamén defenden á Xunta, critica. Ademais, Contraminacción sostén que "en xaneiro de 2019, a propia Dirección de Minas remitiu á ONU a tradución ao inglés de partes dun segundo informe asinado por Felipe Macías na tentativa de defender ante este órgano a inexistencia de contaminación mineira".

A "gravidade" destes feitos, tanto a nivel científico como ambiental e penal, levaron a que estes colectivos soliciten á Universidade de Santiago (USC) que retire a condición de profesor emérito a Felipe Macías tras a investigación dos feitos.

INFORMES "DE RÉPLICA" PARA DESMENTIR

Ademais, Contraminacción fai mención a un informe "de réplica" dado a coñecer a pasada semana, realizado por sete técnicos --entre eles o doutor en Xeofísica Steven H. Emermean--, que "desmente" a tese de Macías da existencia dun "suposto fondo natural de metais", á vez que alerta dos impactos actuais da minaría.

Por outra banda, un segundo informe do doutor en Arqueoloxía e Historia Antiga André Pena mostra a "burla" que representan os argumentos "históricos" presentados por Macías e o modo no que foron "abertamente plaxiados de distintas fontes".

O director xeral de Industria, Enerxía e Minas, Ángel Bernardo Tahoces | Fonte: Europa Press.