A maxistrada Conde-Pumpido aspira a ser a primeira muller en presidir o TSXG
Pugnará por relevar a Miguel Anxo Cadeas con, polo menos, outro tres candidatos, entre eles o conservador Fernando Alañón Olmedo.
Por Europa Press / Redacción | SANTIAGO DE COMPOSTELA | 02/07/2019 | Actualizada ás 17:47
A maxistrada progresista María Teresa Conde-Pumpido aspira a ser a primeira muller en presidir o Tribunal Superior de Xustiza de Galicia (TSXG), cargo polo que pugnará con, polo menos, outro tres aspirantes, entre eles o conservador Fernando Alañón Olmedo.
En declaracións a Europa Press, Conde-Pumpido, asociada de Xuíces para a Democracia e xuíza da Sala do Social do TSXG, destacou que formalizou a súa candidatura por "dúas cousas": "Levo 40 anos na xustiza galega e creo que acumulara experiencias que podían achegar melloras á comunidade autónoma e porque a coñezo ben e levo tempo pensando en posibles solucións".
A iso sumou que "tiña que haber unha candidatura dunha muller". Respecto diso, incidiu en que "hai máis mulleres que homes impartindo xustiza", polo que apostou por "visibilizalo". "Os presidentes das audiencias provinciais tamén son homes", lembrou, para reafirmar que "é bo que se visibilice que hai unha muller" en postos de responsabilidade, como a presidencia do TSXG.
Preguntada sobre se a avala a presenza familiar en institucións --o seu irmán foi fiscal xeral do Estado--, María Teresa Conde-Pumpido reivindicou que "cada un ten a súa experiencia propia". "Os 17 anos de avogada, máis 24-25 de maxistrada e seis anos no Consello Consultivo danme un enfoque desde distintos prismas", subliñou.
A candidata da asociación progresista Xuíces para a Democracia naceu en Pontevedra no ano 1951, é licenciada en Dereito pola Universidade de Santiago de Compostela e avogada en exercicio en Vigo desde 1977. En 1984, e ata 1989, ostentou a Presidencia da Confederación Estatal de Avogados Novos e no ano 1994 accedeu ao cargo de maxistrada pola cuarta quenda de xuristas de recoñecido prestixio. Desde novembro de 2005 ocupa praza de maxistrada especialista na Sala do Social do TSXG.
OUTROS CANDIDATOS
Para relevar a Miguel Anxo Cadeas, que se xubilou o pasado mes de abril, na presidencia do TSXG presentou a súa candidatura o maxistrado Fernando Alañón Olmedo, da conservadora Asociación Profesional da Magistratura (APM).
En declaracións a Europa Press este maxistrado da Sala do Civil e o Penal do TSXG confirmou que formalizou a súa candidatura "a semana pasada" fisicamente, mentres que o prazo para presentar candidaturas finalizou este luns a medianoite. Alañón Olmedo destacou que afronta o proceso "con ilusión" e "con esperanza". "Axústome ás bases e ao perfil", sentenciou o maxistrado.
Fontes xudiciais apuntaron que outros dous candidatos se postulan ao posto de presidente do TSXG: José Fernando Lousada Arochena --maxistrado do TSXG-- e José María Gómez e Díaz-Castroverde --presidente da Sala do Contencioso-Administrativo do Tribunal Superior de Xustiza de Galicia--.
