Conde anima as empresas da economía social a traballar coa Xunta para crecer "de forma máis xusta"
O conselleiro de Economía, Emprego e Industria, Francisco Conde, lembrou que neste sector Galicia conta con máis de 3.000 entidades que facturan 3.000 millóns de euros e dan emprego a 14.500 persoas.
Por E.P. | SANTIAGO DE COMPOSTELA | 06/07/2019 | Actualizada ás 19:32
O conselleiro de Economía, Emprego e Industria, Francisco Conde, animou este sábado ás empresas e entidades que conforman a economía social a seguir traballando en colaboración coa Xunta para que Galicia "poida manter un crecemento baseado nos valores deste modelo", é dicir, "un crecemento cada vez máis xusto e sustentable".
Así o indicou Conde este sábado na gala do Día do Cooperativismo Galego, que se celebrou no concello ourensán de Xinzo de Limia, segundo recolleu a Xunta nun comunicado. No evento, entregáronse os premios de Cooperativismo no ensino ao IES Fernando Wirtz da Coruña polo proxecto 'Fungal Biomaterial' e ao CIFP Paseo das Pontes, tamén da Coruña, pola iniciativa 'Biofroita, Sociedade Cooperativa Galega'.
Pola súa banda, a asociación Panxea (Santiago de Compostela) recibiu o galardón aos valores cooperativos; Raiados (Santiago de Compostela), ao mellor proxecto cooperativo novo, e a Cooperativa Agraria da Coruña (Bergondo), o recoñecemento á traxectoria cooperativa.
Conde subliñou que os premiados son "un exemplo para todos aqueles que queiran sumarse á familia da economía social" e lembrou que, neste sector, Galicia conta con máis de 3.000 entidades que facturan 3.000 millóns de euros e dan emprego a 14.500 persoas, representando un 10% do Produto Interior Bruto.
