Pillan o concelleiro e vicepresidente da Deputación de Ourense facendo debuxos durante o pleno municipal
Os socialistas publican imaxes de Armando Ojea (Democracia Ourensana) debuxando un paxaro e unha flor, desatendendo o pleno.
Por Galicia Confidencial | Ourense | 09/08/2019 | Actualizada ás 14:16
Na memoria de moitos están as imaxes de políticos en parlamentos pasando do que acontece nos debates políticos, atendendo a outras cousas, como a célebre imaxe de Celia Villalobos (PP) cando era vicepresidenta primeira do Congreso dos Deputados xogando ao Candy Crush durante o Debate do Estado da Nación mentres presidía o discurso do por entón presidente do Goberno español, Mariano Rajoy. Hoxe, o PSdeG denuncia un caso similar, neste caso no pleno de Ourense, durante o cal o edil de Democracia Ourensana, e vicepresidente da Deputación, Armando Ojea, se dedicou a facer debuxos sobre uns papeis oficiais.
Rafael Villarino, secretario provincial do PSdeG-PSOE de Ourense, compartiu un vídeo no que se ve a Ojea debuxando un paxaro sobre papeis oficiais mentres interviña o concelleiro de Ciudadanos José Araújo. Noutra imaxe publicada polos socialistas galegos tamén se lle ve pintando unha flor.
"Así «traballa» Armando Ojea, membro do grupo de goberno e vicepresidente da Deputación", publicou.
No pleno do concello de Ourense, agora mesmo. Así “traballa” Armando Ojea, membro do grupo de goberno e vicepresidente da Deputación pic.twitter.com/K11te22prE
— Rafa Villarino (@RafaRVillarino_) August 9, 2019
O propio Villarino ironizou sobre a imaxe na que se lle ve pintando unha rosa: "No Pleno do concello de Ourense. Armando Ojea, Concelleiro de DO no grupo de goberno e vicepresidente da Deputación, amosando a súa afinidade polo PSdeG-PSOE".
O PSdeG de Ourense acusa a Ojea de "400 euros da cidadanía por facer garabatos, namentres se debaten cuestións de importancia para a cidadanía". Tamén o BNG se sumou a estas críticas.
