Renfe cancela 30 trens en Galicia este fin de semana de 'operación retorno' ante os paros de CGT

Renfe cancelará 30 trens en Galicia este fin de semana ante os paros parciais que CGT ten convocados na compañía ferroviaria para este venres 30 de agosto e o domingo 1 de setembro, datas que coinciden coa 'operación retorno' das vacacións de verán.

En concreto, son 20 trens de media distancia, como o Vigo-Urzáiz-A Coruña das 11,15 horas e o Valença do Minho-Vigo-Guixar das 20,44 horas; oito de longo percorrido (Madrid-A Coruña e A Coruña-Hendaia, por exemplo) e dous convois cuxa circulación estaba prevista para o día 31 (Monforte-Pontevedra e A Coruña-Ferrol).

Nunha nota de prensa, CXT en Galicia denuncia que "nin o ministerio nin a propia empresa deron sinais de vida" no conflito, despois de que a organización pedise a intervención de Fomento. En total, a operadora cancelará uns 360 trens de viaxeiros este fin de semana. Trátase das dúas últimas xornadas do calendario de paros parciais que CGT levou a cabo en Renfe este verán, que implican dous paros diarios, de catro horas cada un, que teñen lugar entre as 12,00 e as 16,00 horas, e entre as 20,00 e as 24,00 horas.

No entanto, esta convocatoria obriga ao Ministerio de Fomento a decretar servizos mínimos para garantir a mobilidade dos viaxeiros e a Renfe a cancelar os trens que non forman parte dos mesmos, que garanten as circulacións do 78% dos trens AVE e Alta Velocidade habituais e o 65% dos de Media Distancia.

Do total de 360 trens non incluídos nestes servizos mínimos e que se anulan este venres e este domingo, 118 deles serán de AVE e de Longa Distancia e os 242 restantes de Media Distancia.Por días, este venres, Renfe terá que cancelar sesenta trens AVE e de Longa Distancia, e outros 128 rexionais. No caso do domingo 1 de setembro, a convocatoria de paros leva a anular a circulación de 172 trens, 58 de AVE e de Longa Distancia e outros 114 rexionais.

DÍA DE "EXCEPCIONAL MOVEMENTO DE PASAXEIROS"

Na súa resolución de servizos mínimos, o ministerio atribúe a porcentaxe de servizos mínimos fixados ao feito de que os paros se convocan en días de "excepcional movemento de viaxeiros". Ademais, no caso do venres, coinciden "a mobilidade propia de días laborais coa operación retorno vacacional, afectando, por tanto, a todos os tipos de trens", argumenta Fomento.

"De non determinarse servizos mínimos, o exercicio do dereito á folga orixinaría un dano superior e innecesario para os cidadáns", conclúe o ministerio, que alerta do colapso en estradas de acceso ás grandes capitais en caso de restrinxir o servizo de proximidade ou do prexuízo que se causaría ao "excepcional número de viaxeiros que reservou con gran antelación billetes para estas datas.

Cos seus paros, continuación dos do 31 de xullo e o 14 de agosto, CGT pretende reclamar un aumento do persoal de Renfe.Tamén denuncia a "imposibilidade" de cumprir o "espírito" da redución da xornada laboral semanal a 37,5 horas pola decisión da empresa de aplicala diariamente, cunha diminución de 17 minutos do tempo de traballo de cada día, no canto de forma acumulada sumando días libres.

SERVIZOS MÍNIMOS

Renfe destaca que a xornada de folga en Galicia deste venres transcorre con normalidade e cúmprense os servizos mínimos. Así o apuntaron fontes de Renfe a Europa Press, que lembran que na xornada de folga do domingo, 1 de setembro, haberá dous trens menos afectados e serán un total de 28.