Sobe o paro en Galicia máis que a media do estado

O número de parados rexistrados nas oficinas dos servizos públicos de emprego (antigo Inem) subiu en 2.899 persoas en agosto en Galicia en relación con xullo, o que supón un incremento do 1,92%, algo superior ao rexistrado pola media estatal, segundo os datos que publica este martes o Ministerio de Traballo, Migracións e Seguridade Social.

En relación co mesmo mes de 2018, a cifra de desempregados descende en 10.604 persoas, o que representa unha caída do 6,45%, case o dobre da media, e o total sitúase en 153.820 parados na comunidade galega.

No conxunto estatal, o aumento en agosto en comparación co mes anterior foi en 54.371 desempregados, o seu maior ascenso neste mes desde 2010, cando aumentou en 61.083 persoas. Tras a subida de agosto, lastrado polo final da tempada turística, o volume total de parados situouse en 3.065.804 desempregados, o seu nivel máis baixo nun mes de agosto do últimos dez anos.

Por provincias, en Galicia, o maior repunte produciuse en Ourense, do 2,14%, con 366 desempregados máis, ata 17.467. Seguiulle Pontevedra, cun ascenso do 2,01%, en 1.186 persoas, ata 60.249.

Por baixo do 2%, cun 1,89% e un 1,42%, respectivamente, situáronse os incrementos da Coruña e Lugo, que contabilizan 1.142 e 205 desempregados máis, ata un total 61.412 e 14.692.

SOBE EN SERVIZOS, INDUSTRIA E CONSTRUCIÓN

Os 153.820 parados repártense na comunidade entre 90.483 mulleres e 63.337 homes. Por sector de actividade económica, subiu en 2.672 o dato en servizos, ata 105.630; en 287 na industria, ata 17.394; e en 41 en construción, ata 12.344.

Pola contra, reduciuse o desemprego en agricultura, en 98 persoas, ata 5.022; e no colectivo sen emprego anterior, en tres, ata 13.430. Este último grupo, o de parados sen emprego anterior, distribúese entre 4.562 homes e 8.868 mulleres.

COBERTURA POR DESEMPREGO

A cobertura total do sistema de protección por desemprego situouse en xullo en Galicia no 56,29%, segundo os datos que publica este martes o Ministerio de Traballo, Migracións e Seguridade Social.

Esta porcentaxe calcúlase como o número de beneficiarios de prestacións por desemprego, que en abril alcanzou as 83.546 persoas, dividido entre a cifra de parados dese mes (cando había 163.412) unha vez descontados os correspondentes ao colectivo sen emprego anterior (14.999).