Feijóo defende agora a coalición España Suma, e non as siglas do PP, para unir a Vox e C's

O presidente da Xunta, Alberto Núñez Feijóo, non acaba de encaixar as propostas do seu líder en Madrid. Tanto é así que ten que facer equilibrios para tentar quedar ben con Casado e coas bases do PPdeG.

Se fai uns días aseguraba que Fraga vería con malos ollos a coalición Galicia Suma (España Suma no conxunto do estado), este luns admitiu que a "desunión" do panorama actual prexudicou ao seu partido. "Se eses 10.800.000 votos votasen de maneira unida ao PP, se volvésemos unir na contorna deste partido a estes votantes, España tería catro anos de estabilidade", dixo en alusión a esa coalición.

Fronte a un PSOE que "non é capaz de xestionar esa vitoria escasa nas eleccións de abril", Núñez Feijóo apostou por "volver reconstruír o centro dereita en España". Para iso, o partido "maioritario", o PP, "foi xeneroso con esa proposta" de coalición. "Estou seguro que moitos votantes de VOX e Cidadáns quere esa proposta", dixo Núñez Feijóo, que puxo en dúbida, no entanto, que os seus líderes estean a favor.

PEDRO SÁNCHEZ

Tamén acusou este luns a Pedro Sánchez e ao PSOE de "xogar coas institucións". Asegurou que a política española está "a atravesar unha crise moi parecida á crise económica" dos últimos anos, e afirmou que "todo parece indicar que os intereses do partido socialista" pasan por unhas cuartas eleccións. "Quedan cada vez menos días e cada vez menos posibilidades de acordo con socios para que a investidura prospere", explicou.

Feijóo aseverou que ao PSOE, a día de hoxe, "interésanlle novas eleccións", polo que "está a preparar desde Moncloa a nova campaña electoral", como, segundo criticou, fixeron os socialistas tras a moción de censura a Mariano Rajoy.